Gaur egungo bioteknologien eta nekazaritzaren arteko harremanaz hitz egingo dute Ondarroan
Ondarroako Zientziaren Giltzak elkarteak antolatuta, hitzaldia izango da, astelehenean [urriak 1], Beikozinin, 18:30etik aurrera, gaur egungo bioteknologien eta nekazaritzaren arteko harremana gaitzat hartuta. Gaiaren inguruko argiak eta itzalak azalduko ditu gonbidatuak, Mertxe de Renobales Scheifler biokimikoak. Hitzaldia gaztelaniaz emango du.
Hizlariak landareen hobekuntza genetikoaren inguruan bioteknologiaren arloan dauden berrikuntzen inguruan hitz egingo du. Berrikuntzen onurak eta sortzen diren arazoak izango ditu hizpide.
Mertxe de Renobales kimikan lizentziatu zen, 1975ean, Bilboko Unibertsitatean, eta biokimikan doktorea da. Hamairu urtean ikerlari eta irakasle lanetan aritu zen Ipar Amerikako hainbat unibertsitatetan. Euskal Herrira bueltatzean, Inasmet Fundazioko Bioteknologiaren esparruko ikerlari izan zen, gaur egun Tecnalia dena. Horren ostean, Farmazia Fakultateko irakasle izan zen. Ikerketaren alorrean, batez ere lipidoen inguruko ikerketak egin ditu.
Azken hogei urteotan, zientzia publikoarengana hurbiltzen lan egin du.
