Ehunka lagun batu dira hilketa matxista salatzeko Lea-Artibain eta Mutrikun egin diren elkarretaratzeetan

Aulesti,Berriatua,Lekeitio,Markina-Xemein,Mutriku,Ondarroa

2018/09/27

Elkarretaratzetak egin zituzten, atzo [irailak 26] Lekeition, Markina-Xemeinen, Mutrikun eta Ondarroan, azken hilketa matxista salatzeko. Gaur [irailak 27], 19:30ean, Berriatuan eta Aulestin batzeko deia egin dute. Berriatuko elkarretaratzea zaratatsua izango da, gainera; kazuralak eroatea eskatu dute. Hilketa matxista martitzen eguerdian [irailak 25] gertatu zen, Bilbon. Maguette Mbeugou da hildako emakumea. 25 urte zituen eta adin gabe biren ama zen. Hilketa gertatu zenean umeak etxean zeudela baieztatu du Segurtasun Sailak. Bikotekidea Mutrikuko Madalena auzoan atxilotu zuten, arratsaldean, hilketa leporatuta. Hilketaren aurrean, Mutrikuko Udalak herrian emakumeen eskubideak errespetatzearen alde lan egingo duela esan du. «Mutriku ez da inoiz inolako erasotzaileren babesleku bihurtuko, eta udalak lan egingo du gure udalerrian bizi diren emakume guztien eskubide guztiak errespetatuak izan daitezen», adierazi dute agiri baten bidez. Arrazoi horregatik, Emakumeak Mutrikun Abixan elkarteak atzo antolatu zuen elkarretaratzearekin bat egin zuen.