40+1. Euskal Zine Bilerak Begirada saria eman dio Kimuak egitasmoari
Loli Astoreka eta Aitor Abaroak gidatutako irekiera ekitaldiagaz eman zioten hasiera zapatuan [urriak 6], Lekeition, 40+1. Euskal Zine Bilerari. Bileraren nondik norakoak ezagutzera eman zituzten Muntu antzerki taldearen umorezko ikuskizunagaz lagunduta. Gainera, Kimuak egitasmoari Begirada saria eman zioten, urteetan zehar euskal zinema hedatzen egindako lanagatik. Bere koordinatzaileak, Esther Caberok, jaso zuen saria Andoni Iturbe Bizkaiko Foru Aldundiko zuzendariaren eskutik. Ekitaldia Telmo Esnalen Dantza filmaren proiekzioagaz biribildu zuten.
Zapatuan eman zioten hasiera bai eta ere Kameratoia rallyari. Filmaren gaia eta azalpenak eman zizkieten goizean parte hartzaileei, eta 24 ordu izan zituzten film labur bat osatzeko. Arreta guztia jarri zuten lanean ekimenean parte hartu zuten hamalau taldeetako 42 parte hartzaileek. Lekeitioko kaleetan ibili ziren irudiak hartzen ahalik eta film laburrik txukunena prestatzeko. Erronka ez zen erraza izan, eta beraz, azkenean 6 talde animatu ziren lanak aurkeztera.
Domekan banatu zituzten sariak Ugaitz Alegriak aurkeztutako sari banaketan. Mikel Zumetak eta Yogurinha Borovak osatu zuten epaimahaia eta hiru sari banatu zituzten: 1.200 euroko lehen saria Lapatx taldearen Ilunpean filmak eraman zuen, bigarren sariko 800 euroak Txistana taldearen Anamorfiarentzat izan ziren eta 600 euroko hirugarren saria Askopena Produkzioak taldearen Bisitariarentzat. Publikoak erabaki zuen laugarren saria, eta hori ere Bisitariarentzat izan zen.
Asteburua amaitzeko, (H)emen gaude ikus entzunezko sektorearen espazioa zabaldu eta Maider Oleaga (1976, Bilbo) zinemagilearen ibilbidea ezagutzera emango duen tarteari hasiera eman zioten Verabredung filmaren proiekzioagaz.
Gaurtik [urriaren 8] aurrera, arratsaldero, lehiaketan parte hartuko duten lanak ikusteko aukera egongo da, 20:00etan, Ikusgarri zinema aretoan. Guztira, 20 film laburrek parte hartuko dute lehiaketan, eta aurten, Mikel Zumeta, Itziar Ituño, Eider Eguren eta Maider Oleaga izango dira zuzendaritza, gidoia eta film onenaren sariak erabakitzearen arduradunak. Ikuslearen saria ere emango dute 40+1. jaialdian.
Esther Cabero Kimuak egitasmoaren koordinatzailea Begirada saria hartzen Andoni Iturbe Bizkaiko Foru Aldundiko zuzendariaren eskutik. Argazkia: Euskal Zine Bilera
Kameratoiaren sari banaketa. Ugaitz Alegria aurkezlea, Yogurinha Borova eta Mikel Zumeta. Argazkia: Euskal Zine Bilera
