Gehiengo sindikalak elkarretaratzea deitu du Markina-Xemeingo lan istripua salatzeko
Euskal Herriko gehiengo sindikalak deituta (ELA-LAB-ESK-STEILAS-EHNE eta HIRU), elkarretaratzea egingo da bihar [urriak 9] 12:00etan, Markina-Xemeingo udaletxe aurrean, joan den barikuko [urriak 5] lan istripua salatzeko.
Zuhaitzak botatzen lan egiten zuen 50 urteko Markina-Xemeingo behargin bat hil zen barikuan zuhaitz bat gainera erorita. “Heriotza berri honen aurrean dei egiten diogu langile klaseari Markina-Xemeingo udaletxe aurrean deitu dugun elkarretaratzean parte hartzeko”.
LAB sindikatuak jakitera eman duenez, 56 langile hil dira aurten Euskal Herrian euren lanpostuetan edo horien ondorioz, joan den astean hiru. “Salatu beharra dugu 2013tik hona hildakoen kopurua gora egiten ari dela, 2017an 54 langile hil ziren lanean. Istripu hilgarriak handitzen ari dira behin ekonomiaren jarduera berreskuratu zenetik, langileontzat prekarietatea eta pobrezia da zabaldu dena”.
Basogintzan, arriskuak handiak direla nabarmendu dute, eta aldiz, lan baldintzak gero eta prekarioagoak, “langileen osasunaren gainetik irabazi asmoa nagusitzen baita”. Beraz, langile horren heriotzaren arrazoiak ikertzea eskatu dute, bai eta bere lan baldintzak eta lan erritmoak ere. “Gaur eguneko egoera mugiarazi eta istripuak ekidin nahi badira, lan baldintzak eta lan segurtasuna hobetu behar dira ezinbestez. Borroka eta mobilizazioan jauziak emateko prest gaude, lan istripuak eta horren atzean dagoen prekarietatea lehen mailako arazo politikoa bilakatu arte”.
