Jendetza batu da Markina-Xemeingo 36. Urriko Azoka Nagusian

2018/10/13

Jendea eta jendea. Horixe da gaur [urriak 13] Markina-Xemeinen ikusi ahal izan dena. Goizean goizetik hasita, jendetzak Markina-Xemeingo kaleak hartu ditu. Batzuen esanetan, “inoizkorik jende gehien batu da”. 36. Urriko Azoka Nagusia, beraz, arrakastaz hasi da goizean. Eta orduek aurrera egin ahala, jendetza gehitzen zihoan. 12:30ak aldera ia ezin zen oinez ibili ez udaletxe atzeko aparkalekuan eta Zelai inguruetan. Ekoizleak zein herritarrak gustura geratu dira. Ekoizle gehienen berbetan, azoka zabaldu denetik jendea erosten ibili da. Aurten, estreinako, azoka 17:00ak arte egon da zabalik, eta arratsaldean salmenta gutxi egin badituzte ere, goizean asko saldu dutela esan dute.

[zuzenean ARGAZKI GALERIA IKUSI]

12:30ak aldera hasi dira Tarineko musikariak ere musikagaz kaleak girotzen. Ordurako, baina, Markina-Xemein jaian erabat murgilduta zegoen. Udaletxe atzeko aparkalekuan ikusgai zeuden animaliak, eta horrek txikiak zein nagusiak erakarri ditu. Batzuk taloa, txorizoa edota okela pintxoa jaten zuten bitartean, besteak herriko tabernetan poteoa egiten edo artisauen postuak bisitatzen ibili dira.

[zuzenean ARGAZKI GALERIA IKUSI]

Okela pintxoek ere arrakasta eduki dute. Jakitera eman dutenez, gutxi gorabehera 120 kilo okela jan dira. Eta aurten estreinako egin den bazkarian ere jendetza batu da; 200 lagun batu dira Zelaian bazkaltzen, eta txartel guztiak amaitu dira. Antolatzaileek aurreratu dutenez, datorren urtean jende gehiagorentzako lekua egingo dute Zelaian. “Aurtengoa froga izan da. Nahi duguna da herri bazkarian urtez urte gero eta jende gehiagok parte hartzea”. Bazkalostean sari banaketa egin dute, eta honakoak izan dira irabazleak:

Ortuari mahairik onena: Igor Lete (Ispaster). Isa Mandiola udal ordezkariak eman dio saria.
Gaztarik onena: Santamañe (Markina-Xemeingo Barinaga auzoa). Rakel Elu Lea-Artibai Amankomunazgoko presidenteak eman dio saria.
Baserriko ogirik onena: Labegur (Berriatuko Elizburu baserria). Garbiñe Saenz de Buruaga Ispasterko alkateak eman dio saria.
GANADUAK:
- Zaldirik onenak: Jabier Armaolea (Etxebarriko Antxi baserria). Saria Jesus Iriondo Etxebarriko alkateak eman dio.
- Asturianak (idiak): Jesus Altzibar (Markina-Xemein). Saria Josu Ogiza Miba kooperatibako kudeatzaile eta Landa Garapenerako elkarteko presidenteak eman dio.
- Limusinak (idiak): Miren Idoeta (Etxebarriko Urbitxe baserria). Saria Maite Peñakoba Bizkaiko Foru Aldundiko Nekazaritza eta Abeltzaintzako zuzendariak eman dio.
- Mestizuek: Itziar Iurrebaso (Etxebarriko Eskutuzolo baserria). Saria Rakel Gandiaga Ziortza-Bolibarko zinegotziak eman dio.
- Pirenaikak: Martzelino Egurrola (Etxebarriko Adorrixa baserria). Saria Juan Mari Totorika Landa Garapenerako arduradunak eman dio.

Oro har, 36. Urriko Azoka Nagusian lanean aritu diren guztiei eskerrak eman nahi izan dizkiete antolatzaileek.

Markina-Xemeingo 36. Urriko Azoka Nagusia

Erlazionatutako edukiaARGAZKI GALERIA: Markina-Xemeingo 36. Urriko Azoka Nagusia