Ekai gogoan hartuz, LGTBIQ kolektiboaren ikusgarritasunaren alde borrokan jarraitzeko aldarria egin dute Ondarroan

2018/10/13

Ekai Lersundi ondarrutarrak 17 urte beteko zituen gaur [urriak 13]. Eta urtebetetze egunaren harira, bere gurasoek haren eta LGTBIQ kolektibo osoaren aldeko omenaldia egin nahi izan dute. Ondarroako Itsasaurre plazan egin da ekitaldi xume bezain hunkigarria. Han izan dira, besteak beste, Ekairen senide eta lagunak, Chrysallis Euskal Herria taldeko kideak, Errespetuz taldeko ordezkariak, udal ordezkariak eta beste hainbat herritar.

[zuzenean ARGAZKI GALERIA IKUSI]

Ekairi eta LGTBIQ kolekbtibo osoari eskainitako oroigarria bistaratu aurretik, Elaxar Lersundi Ekairen aitak hitz batzuk eskaini nahi izan ditu. “Mila esker guztioi, bihotz-bihotzetik, gaur hona etortzeagatik. Eta baita ere orain arte emandako babes guztiagatik. Guk eskatzen duguna da LGTBIQ kolektiboaren ikusgarritasunaren alde borrokan jarraitzeko, borroka hori guztiona baita”. Halaber, transexualitatea gaixotasun bat legez ez hartzeko eskaera luzatu zuten Chrysallis eta Errespetuz taldeetako ordezkariek. Lersundik aipamen berezia egin nahi izan dio 2015eko abenduan hil zen Bartzelonako Rubi herriko Alan gazteari. Azken horren gurasoak (Ester eta Xavier) ere Ekairen gurasoen aldamenean egon dira omenaldian. “Gure eskerrik beroenak haren gurasoei. Urrunetik (Bartzelonako Rubi herritik) etorri dira egun berezi honetan gurekin egoteko”.

[zuzenean ARGAZKI GALERIA IKUSI]

Ekairen lagun batek Mi heroe abestia abestu du, familiaren lagun batek hitz batzuk irakurri ditu eta Iñaki Lersundi Bertsutan bertso eskolako kideak eta udal zinegotziak bertsoa bota du. Azkenik, familiaren lagun batek dantzan egin du. Ekitaldia LGTBIQ kolektiboaren ikusgarritasunaren alde borrokan jarraitzeko aldarriagaz amaitu da.

Ekai Lersundiren eta LGTBIQ kolektiboaren aldeko omenaldia, Ondarroan

Erlazionatutako edukiaARGAZKI GALERIA: Ekai Lersundiren eta LGTBIQ kolektiboaren aldeko omenaldia, Ondarroan