Euskal presoen egoerari irtenbidea emateko eskatuko dute Donostian, zapatuan
Orain Presoak dinamikak deituta, milaka kilometrotara urrunduta dauden eta giza eskubideak urratuak zaizkien euskal presoen egoerari irtenbidea emateko eskatzeko aldarrikapena egingo dute Donostian. Orain presoak izenburupean, Antiguako tuneletik manifestazioan aterako dira zapatuan, 17:00etan.
Herriz herri autobusak antolatu dituzte, eta horietan joateko aurretiaz izena ematea beharrezkoa da. Esate baterako, Ondarroan 15:30ean jarri dute irteera-ordua, Zaldupen, eta mutrikuarrak, ostera, 15:45ean, Goiko biribilgunetik abiatuko dira.
Garai berri baten aurrean ate berriak zabaltzeko beharra dagoela aldarrikatuko dute zapatu honetan. Dinamikaren ordezkariek zenbait arrazoi eman dituzte Donostira bertaratzeko. Euren berbetan, “mendekuak” ezin du espetxe politikaren oinarria izan, eta beraz, “urruntze politika ilegalarekin amaitu eta senideak zigortzeari utzi behar zaio”.
Gaineratu dute larriki gaixo diren presoek etxean egoteko eskubidea dutela. Manifestaziorako deialdia egin, eta bere arrazoiak azaltzeko agerraldian esan zutenez, korapiloak askatzeko unea da: “ETAren disoluzioaren ostean ireki den garai berria probestu eta aspaldidanik espero dugun aldaketa gauzatu dadin gure hondar alea jarri nahi dugu. Bakerantz eta elkarbizitzarantz eramango gaituen aldaketaz ari gara. Sufrimendu gehiago sortzeari utzi eta korapiloak askatu zein zubiak eraikiko dituen jendarte baterantz eramango gaituena”.
AUTOBUSETARAKO IZEN-EMATEAK:
- Aulesti. Illunzar eta Ubilla.
- Etxebarria. Irubide.
- Lekeitio. Aralde, Guzurmendi eta Galarrena.
- Markina-Xemein. Txokoa.
- Mutriku. Zubixa.
- Ondarroa. Anaitasuna eta Kulixka.
