Iruzubietan hasiko da Euskal Herriko 29. Hiru Txirlo Bola Joko Txapelketa
Zapatuan [urriak 20] hasiko da Ziortza-Bolibarko Iruzubietako bolatokian Euskal Herriko 29. Hiru Txirlo Bola Joko Txapelketa. Guztira lau bolatokitatik igaroko da aurtengo norgehiagoka: Bizkaiko Iruzubieta (Ziortza-Bolibar) eta Barinaga (Markina-Xemein), eta Gipuzkoako San Joxepe (Bergara) eta San Migel (Elgoibar).
Saio guztiak 17:00etan hasiko dira, eta ohi duten modura, nahi duen guztiak parte hartu ahalko du. Izena, beti bezala, saioaren egunean bertan eman behar da, azken tiralariak tiraldi guztiak bota orduko. Hiru tiraldi egiteko aukera edukiko dute bolariek.
Bolatokietako arduradunek jadanik bolak aukeratuta dituzte. Hala, txapelketako bola 1 zenbakia izango da, eta apurtuko balitz, ordezkoa, 0a. Ordezko bolatokia Asola Berri izango da.
Hitzorduak. Bergarako San Joxepeko bolatokiak hartuko du bigarren jardunaldia urriaren 27an. Hirugarren bolatokia Barinagakoa izango da, eta azaroaren 10ean elkartuko dira bertan bolariak. Azken saioa Elgoibarko San Migelen egingo dute aurten, azaroaren 17an. Bertan erabakiko da aurtengo txapelduna.
Oraingoan ere, sariak egongo dira ekitaldi bakoitzean: lehenengoa gelditzen denak 65 euroko saria jasoko du, bigarrenak 50 eurokoa, hirugarren sailkatuak 35 eurokoa, laugarrenak 20 eurokoa, bosgarrenak 10 euro jasoko ditu, eta seigarren sailkatuak oparia.
Euskal Herriko 28. Hiru Txirlo Txapelketako irabazleak Asola Berri elkarteko Bittor Astigarraga eta Graxi Ezpeleta izan ziren; Iruzubietako bolatokian jokatu zen azken saioa. Harrera ona eduki zuen norgehiagokak, eta saioz saio lagunarteko giroa izan zen nagusi. Aurten ere horrela izatea espero dute.
Euskal Herriko 28. Hiru Txirlo Txapelketa.
Euskal Herriko 28. Hiru Txirlo Txapelketako azken saioa.
