Gipuzkoako zahar etxeetako langileak grebara deitu dituzte ELA-k eta LAB-ek
Egunotarako greba iragarri dute ELA eta LAB sindikatuek. ELAk deituta, gaur [urriak 24], bihar [urriak 25] eta etzi [urriak 26] egingo dituzte lanuzteak. LABek, bestalde, etzirako deitu du greba eguna.
ELAk urte amaiera arte hainbat lanuzte egingo zituela agertu zuen. Patronalek eskaintzen duten izozketen, aldundiaren txosten partzialen eta Jaurlaritzaren zerbitzu minimo klasisten aurrean, Gipuzkoako zahar etxeetako eta eguneko zentroetako ELAko langileak lanuzteak egitera deitu dituzte. Gaur, esaterako, aldarrikapen eguna egingo dute eskualdeetan. Bihar, berriz, aldarrikapen eguna egingo dute herrietan. Etzi, azkenik, aldarrikapen eguna egingo dute Donostian. 11:30ean, Foru aldundiaren aurrean ekitaldia, eta ondoren, manifestazioa egingo dituzte.
Era berean, ELAk salatu nahi izan du patronalaren eta aldundiaren jarrera onartezina dela prozesuan. “Aldundiak txostenetan deskribaten dituen gertaera serioen konstantziarik ez duela berresten du. Jaurlaritzaren zein diputazioaren asmoa agerian utzi dute azken gertaerek: langileen grebarako eskubidea urratu eta gatazka luzaraztea da, ez dagozkien ardurak bere gain hartzea”. Azpimarratu dutenez, aldundiaren txostenak babestutako zerbitzu minimoen ordena berriak zerbitzuak igo ditu. “Gauzak egiteko modu horrek Bizkaiko Foru Aldundiaren moduak gogorarazten dizkigu, zeinak ahal zuen guztia egin zuen gatazka areagotzeko eta, ondorioz, urtebeteko grebak bi urte baino gehiago iraun zuen”.
Negoziazio mahaian patronalak aurkeztutako eskaintza lotsagarria dela berritsi dute. “Bi urteren ondoren sindikatuek egindako proposamenari erantzuteko dezentzia ere ez dute izan, eta eskaintzen duten bakarra 2017 eta 2018rako izozketa da. Baina sektore honetan prekarietatea betikotu eta gatazka larriagotu nahi duten administrazio eta patronalaren aurrean, ELAk sektorea duintzeko eta kalitate gehiagoz hornitzeko azkenera arte borrokan egingo du”.
Borroka areagotu. LAB sindikatuak, bere aldetik, urtebeteko mobilizazioen ondoren, borroka areagotzea erabaki du, barikuan [urriak 26] grebara deituz. Mobilizazioekin jarraitzeko, egun berean elkarretaratzea egingo dute 12:00etan, Donostiako Gipuzkoa Plazan, Gipuzkoako Foru Aldundiaren jauregiaren aurrean. Eta egoerak bere horretan jarraituz gero, grebarako deialdi gehiago egingo dituztela aurreratu dute.
Aurreko astean, hain zuzen ere, Gipuzkoako zahar etxeetako lan hitzarmen berria negoziatzeko mahaia batu zen. LABek agertu duenez, Adegi, Matia 2020, Lares eta ACGG patronalek Gipuzkoako langile guztieentzat herrialdeko lan hitzarmen bat lortzeko duten borondate eza erakutsi zuten.
LABek salatu duenez, bestalde, bileran patronalek bestelako proposamen bat aurkeztu zuten. “Ez diete gure plataformei erantzuten, nahiz eta behin baino gehiagotan eskatu diegun. Nazkatuta gaude patronalek duten jarrerarekin, negoziazio mahai honek langileen beharrei ez erantzutearekin, sektore honen arduradun nagusia den Gipuzkoako Foru Aldundiak gure behar eta aldarrikapenei muzin egitearekin”.
ALBISTE HONEKIN LOTUTA: Gipuzkoako zahar etxeetako langileak grebara deitu dituzte
ELAk Donostian irailean egindako mobilizazioa. Argazkia: ELA
LAB sindikatuko ordezkariak grebarako deialdia egiten. Argazkia: LAB
