Markina-Xemeingo Gazte Egunak jendez bete du Plazabarripea
Sei urte eta gero, Gazte Eguna berreskuratu du Markina-Xemeinen indarra hartzen ari den gazte mugimenduak. Euria egin badu ere, giro onean ospatu dute gaurko [urriak 27] egun berezia herriko eta inguruetako hainbat gaztek. Aurtengo Gazte Egunaren leloa Gaztion taupadaz, herri bizixe izan da, eta ekintzetan parte hartu duten gehiengoak aurtengo leloa zeramaten kamiseta urdinak eta zapi arrosak eraman dituzte soinean.
Antolatzaileek egitarau oparoa prestatu dute. Eguerdian hasi dituzte ekintzak, poteoagaz. Minutuak pasa ahala jende gehiago batu da karro poteoan, eta tartean, jolasen bat edo beste ere egin dute. Hori bai, euria ari zuenez, prestatuta zituzten jokoetariko batzuk bazkalosterako utzi dituzte.
Gazteak poteora batu ahala, pegatina bat jaso dute, eta pegatinen jolasa hasi dute. Bakoitzari gai bati buruzko pegatina bat banatu diote, denak ere desberdinak, eta gai horrekin lotutako kide kopurua bilatzen eta batzen saiatu behar izan dute. “Joko hauek, hain zuzen, gure artean harremantzeko aitzakia bat dira”, azaldu dute gazte asanblako kideek.
Poteoa egin ondoren, bazkari herrikoian batu dira herriko eta eskualdeko herrietako gazteak. Plazabarripean 200 lagun inguru batu dira giro onean. Jaten hasi aurretik, gainera, talde argazkia atera dute frontoi txikian, eta tartean Euskaraldiagaz ere bat egin dute.
Bapo bazkaldu ondoren, jolasekin jarraitu dute. Besteak beste, pegatinen jolasarekin jarraitu dute eta kantu bingoa ere egin dute. Kantuak ipintzen joan dira, eta kantu horrek kartoitik ezabatzen joateko zenbaki bat ordezkatu du. Joko denak ere harremanak estutzeko egokiak direla nabarmendu dute gazte Asanbladako kideek.
Jaia goizaldera arte luzatzeko asmoa dute. Proposamenen artean musika izango da nagusi. Arratsaldean Susunkordaren kontzertua, eta gauean, berriz, Legen Beltza, Mugi Pandero eta DJ. Txankletak girotuko dute Plazabarria.
Markina-Xemeingo Gazte Eguna
