60 mendizalek egin dute Mutrikuko inguruetan egin den Mendizale Helduen Ibilaldia
Domekan [urriak 28] Gipuzkoako 32. Mendizale Helduen Ibilaldia egin zuten Mutriku eta inguruko auzoetatik. Burumendi mendizale elkarteko kideek eman duten datuen arabera, 60 bat lagunek egin zuten mendi ibilaldia; eguraldi petrala ari zuenez, ohi baino jende gutxiago batu zen. Arrasatetik, Donostialdetik, Mutriku eta inguruko herrietatik etorritakoak izan ziren gehienak. “Talderik jendetsuena Arrasatetik etorri zen. 25 bat lagun etorri ziren”.
Eguraldi txarra zegoenez iragarrita, gainera, ibilaldia zer edo zer moztea eta moldatzea erabaki zuten Burumendiek. 12 bat kilometroko ibilbidea egin zuten. “Ibilbidea mozteaz gain, ibilbide mota ere aldatzea garrantzitsua iruditu zitzaigun. Arrisku gutxiagoko tokietatik igarotzen zen bidea aukeratu genuen”.
Parte hartzaileek 08:30ean ekin zieten martxari. Goiko Plazatik abiatuta, honako ibilbidea egin zuten: Erbitxo, Galbaixo, Apain, Lekonde, Olatz eta Ziñuatik Goiko Plazara buelta egin zuten. Tartean, atsedenaldia hartu eta hamaiketako ederra jan zuten Olatzen.
12:30ak bueltan ailegatu ziren mendizaleak Mutrikura, eta Burumendikoek azpimarratu dutenez, ez zen aparteko gertaerarik egon, eta jendea ere oso gustura geratu zen prestatu zuten ibilbidearekin. “Bidea nahikoa lokaztuta bazegoen ere, aterri egin zuen. Hotz handia zegoen, baina ez ginen busti; hori da garrantzitsuena”. Ibilaldia egin ondoren, 50 bat mendizale Lagun Artea elkarte gastronomikoan batu ziren bazkaritan.
Mendizaleak mendian gora. Argazkia: Burumendi
Gipuzkoako helduen ibilaldia. Argazkia: Burumendi mendizale elkartea
