487 kirolarik parte hartu dute Bizkaia Kopa Trailaren Lekeitioko ekitaldian
Kirolariz bete ziren atzo [azaroak 4] goizean Lekeitio eta inguruak. Bizkaia Kopa Trail mendiko kirol liga ezagunaren zazpigarren proba, eta azkenaurrekoa, lehiatu zen, eta 487 kirolzalek parte hartu zuten lau kirol modalitate ezberdinetan: MTB, Trail, Martxa eta Txakur kros probetan.
Independentzia plazatik irten ziren kirol proba guztietako parte hartzaileak. Mendi martxetako parte hartzaileak izan ziren goiztiarrenak, 09:00etan izan zuten irteera-ordua. Kirol ekitaldi hori da lehiaketa formatutik kanpo gelditzen den bakarra, hala ere, harrera ona eduki zuen mendizaleen artean. 42 ibiltarik osatu zuten gutxi gorabehera 9,71 kilometro zituen ibilbide laburra eta 50 ibiltarik 18 kilometroko luzea.
09:30ean hasi zen lehen lehiaketa: txakur krosa. 30 parte hartzaile izan zituen probak, eta irabazleak Leire Dominguez Molinero eta Kenia txakurra (0.53.54) eta Ivan Herrera Perez eta Otto txakurra izan ziren (0.41.48). 15 minutu beranduago ekin zioten lehiari, trail luzeko korrikalariek eta 10:00etan, trail laburrekoek. Ibon San Miguel lekeitiarrak irabazi zuen trail luzea, 20 kilometroak 01.16. 35 denboran osatuz. Silvia Puigarnau izan zen, bestalde, emakumeetan lehenengoa, 01.38.38 denboragaz. Guztira, 13 emakumek eta 113 gizonezkok parte hartu zuten norgehiagokan.
10 kilometroko trail laburreko irabazleak, berriz, Bego Uriarte Ibarrola (50.33) eta Imanol Goñi (41.33) izan ziren. 35 emakumek eta 134 gizonezkok parte hartu zuten lehian.
Azkenik, 10:30ean irten ziren txirrindulariak. Ibilbidea osatuta helmugaratzen lehenengoak Nekane Pradera Belar (01.33.39) eta Jabier Goitia (01.02.38) izan ziren. 70 parte hartzaile eduki zituen mendi bizikleta lasterketak.
Mendi bizikletako parte hartzaileak Lekeitio inguruetan zehar. Argazkia: Lekeitioko Udala
Txaku kroseko parte hartzaileak. Argazkia: Lekeitioko Udala
Traileko parte hartzaileak. Argazkia: Lekeitioko Udala
