Keu Agirretxearen lan berriko 'Moussambani' abestiaren bideoklipa, ikusgai
Musikari ondarrutarrak urtea amaitu orduko argitaratuko du Piztu dira argiak lan berria. Lau abestiz osatutako EPa izango da, eta formatu digitalean soilik argitaratuko du. Horrek argia ikusi aurretik, baina, Moussambani abestiaren bideoklipa argitaratu dute. Kantu horretan Agirretxeak Joseba Irazoki musikariaren kolaborazioa izan du.
Abestiaren izenburua Sidneyko Olinpiar Jokoetan, 2000. urtean ezagun egin zen Ekuatore Gineako igerilariaren izena da. Bi lehiakideak deskalifikatu ostean Moussambanik bakarrik egin behar izan zuen igeri, eta Olinpiar Jokoetan inoiz egindako denborarik txarrena egin zuen. Hari gertatutakoa hitzetara eraman du Aiert Goenaga ondarrutarrak, eta Agirretxeak musika jarri dio. “Heroi galduei” buruz hitz egiten duen abestia da.
Ondokoak dira Agirretxearen lan berria osatuko duten beste hiru abestiak: Zergatik ez abesti berria, Nomadak eta kofrea diskoan jasotako eta 2015ean grabatutako Bila abestiaren lehen bertsioa, eta Sorkun abeslariaren Heldu nazazu kantuaren moldaketa.
