Bizkaia Txapelketa irabazi du Leire Etxaniz pilotari etxebarritarrak
Garaipenak pilatzen jarraitzen du Leire Etxaniz Bengoak. Azkena, aurten estreinatu duten Emakumeen Esku-pilotako I. Bizkaia Txapelketakoa. Bikote gogorra osatu dute pilotari etxebarritarrak eta Eneritz Arrieta azkoitiarrak, eta txapela janztea lortu dute. Bikotea 22-12 nagusitu zen zapatuan [azaroak 17] Bizkaia Frontoian Amaia Araiztegi eta Maite Ruiz de Larramendiren aurka jokatutako finalean.
Irabazleek agindu zuten markagailuan ia partidu osoan, eta beti bezala, Etxanizek bere nagusitasuna erakutsi zuen. Tinko agertu zen Etxebarriko atzelaria eta ez zien aurkariei aukera gehiegirik utzi. Tanto luze eta borrokatuak jokatu zituzten pilotariek, hala ere, Arrietak eta Etxanizek gorriz, aukera guztiak hobeto aprobetxatzen jakin zuten.
Hurre ibili ziren markagailuan bikoteak partiduaren erdira arte, 12 eta 11 jarri zirelarik. Baina Ruiz de Larramendiren huts egite baten ostean, zazpi tanto jarraian egin eta 19-11 raino eraman zuten markagailua gorriek, finala ia erabakita utziz. Urdinak azken kolpeak ematen ahalegindu ziren arren, ez zuten markagailuari buelta emateko aukerarik ere eduki.
Finalari ekin aurretik, 3. eta 4. postuak ere lehiatu zituzten. Norgehiagoka horretan, Patri Espinarrek eta Maddi Mendizabalek 22-11 irabazi zieten Olatz Arrizabalaga gernikarrari eta Olatz Ruiz de Larramendiri 3. postua eskuratuz.
Kontratuagaz. Amateur mailako kirol maila altueneko hamabi pilotariek jokatu dute Emakumeen Esku-pilotako I. Bizkaia Txapelketan eta, lehen aldiz, kiroleko lan-kontratuarekin jokatu dute. “Denontzako esperientzia berria izan da Bizkaia Torneoa. Horrelako frontoian jokatzea berezia da, eta oso gustora aritu gara”, adierazi du Etxebarriko pilotariak.
Emakume pilotarientzako kontratuagaz jokatu ahal izatea berria dela azaldu du Etxanizek. “Aurrerapauso handia izan da Aldundiaren aldetik. Hor ikusten da emakumeen kirola bultzatu nahi duela, eta ea horrela jarraitzen duen txapelketa gehiago antolatzen. Abenduan beste txapelketa bat daukagu larruzko paletakoa eta ea jende gehiago animatzen den ikustera ere”.
Bizkaiko Torneoko kanporaketetan esate baterako, publiko gutxiago egon den arren finalak ikusle gehiago erakarri dituela nabarmendu du. “Jendeak ez ditu emakumeak asko ikusi frontoian, eta badago ikusnahi apur bat ere. Horrek eragiten du baita publikoa frontoira hurreratzea ere”.
Txapelketa jokatu duten hamabi neskak elkar ezagutzen dira, eta finalera heltzea guztien helburua izaten da. Hori dela eta, partida borrokatuak ikusi ahal izan direla uste du. Ligaxkako bigarren partidua nabarmendu du etxebarritarrak esaterako. “Olatz Arrizabalaga eta Olatz R.Larramendiren kontra jokatutako partidua oso gogorra izan zen. Baina, guk maila handia eman dugu txapelketan hasi ginenetik”.
Finala ere zaila izan zela aitortu du. “Batez ere partidu erdira arte gogorra izan zen. Eneritzek eta nik ondo eutsi genuen fisikoki, baina eurak apaldu egin ziren eta akats batzuk egin zituzten, eta agian horregatik alde egin ahal izan genuen. Baina partida osoa berdin joanez gero, ikusi beharko litzeteke zer gertatuko zen”.
Txapelketaz txapelketa. Bizkaiko Torneoa amaitu duen arren, Master Cup txapelketagaz jarraitzen du Etxanizek. Domekan [azaroak 25] dauzkate final laurdenak Zallan, 11:00etatik aurrera. “Oso gogorrak tokatu zaizkit, iazko txapeldunordea eta Patri Espinarren kontra, hor erakutsi beharko da txapela”. Partidu gogorrak izango dira, baina daukan maila erakutsi eta aurrera egiten ahaleginduko dela azaldu du pilotariak. Finalaurrekoak abenduaren 2an izango dira Amezketan, eta finala abenduaren 9an, Azkoitin.
Hori guztiori nahikoa ez balitz, Bizkaiko Pala txapelketa ere jokatzen ari da mutilekin batera, eta larruzko paletan ere jokatuko du abenduaren 8tik aurrera.
Bestalde, atzo [azaroak 19] arratsaldean. Bizkaia Frontoian antolatutako ekimen batean, Bizkaiko Foru Aldundiak aintzatespen saria eman zieten 31 kirol federaziori kirol diziplinan euskararen presentzia gehitzeko eta euskararen erabilera soziala bultatzeko egiten duen lana eskertzeko. Kirol munduko profesionalek ere parte hartu zuten ekitaldian. Pilotarien ordezkari bezala egon zen Leire Etxaniz, Mikel Urrutikoetxeagaz batera. “Beste esperientzia berri bat izan da, eta gustura bizitzeko aukera eman didatelako”.
Finalistak Bizkaia Torneoko sariak hartzen. Argazkia: Bizkaia Frontoia
Leire Etxaniz txapelagaz. Argazkia: Mari Jose Etxaniz
Aitzol Atutxa, Leire Etxaniz eta Mikel Urrutikoetxea, Aldundiak antolatutako ekitaldian. Argazkia: Mari Jose Etxaniz
