Mutrikuko Ipitxarri bihurguneko lanak hasi dira
Gaur [azaroak 19] goizean hasi dituzte Mutrikuko Ipitxarriko bihurgune azpia hobetzeko eta egonkortzeko lanak. Beharrezko konponketak egiteko bi garabi erabiliko dituzte, eta horiek GI-638 errepideko galtzada oso behar dute. Horrenbestez, Mutriku eta Deba batzen dituen errepidea moztuta egongo da azaroaren 23ra arte. Aurreikuspenak betetzen badira, 20:00etan zabalduko dute bidea.
Errepidea moztu badute ere, Mutrikuko Urazamendiko eta Larangako auzotarrek euren auzoetara sartzeko aukera dute. “Errepidearen mozketa Ondarbeltz hondartza parean dagoen aparkalekuan egingo da, eta Urazamendi kalera sartu ahal izango da, Debatik etorrita. Laranga auzora, berriz, GI-638 errepidetik sartu ahal izango da, Mutrikutik etorrita”.
09:00etan zarratu dute errepidea, eta Mutrikun, esaterako, errepidea itxita dagoela adierazten duen trafiko seinalea ipini dute aldundiko langileek Txanbolingo biribilgunean eta Garbiguneko parean. Larangako auzotarrek errepidea auzora arte irekita dagoela adierazten duen seinalea ipintzeko eskatu dute. “Hor ez dago inongo aipamenik auzora, hotelera, jatetxeetara sarrera badagoela”.
Autobus zerbitzu berria. Pisu eta luzera handiko kamioi eta autobusak ezin dira Galbariotik ibili, horiek Lea-Artibaiko BI-633 errepidetik desbideratuko dituzte; hori dela eta, autobus ordutegi berria ezarri dute datozen egunotarako. Hala, Lurraldebusen DB03 Lekeitio-Donostia, DB04 Mallabia-Deba-Ondarroa, DB05 Ondarroa-Zumaia eta DB06 Soraluze-Ondarroa lineek aldaketak edukiko dituzte ibilbide eta geralekuetan.
Langileak Ipitxarrin. Argazkia: Iñaki Arin
Anezka zerbitzuak Mutrikuko Urazamendi auzoko autobus erabiltzaileei ere emango die zerbitzua datozen egunotanIbilgailuek, nahitaez, Galbaixotik igarotzen den GI-3230 errepidetik igaro beharko dute, eta ordezko errepideak dituen mugak direla eta, erabiltzaileek mikrobusean egingo dute tarte hori, eta ondoren, autobusez aldatu. “Eragina ahalik -eta txikiena izan dadin eta Ondarroatik edo Ondarroara doazen erabiltzaileek Mutrikun aldaketa egitea saihesteko, anezka zerbitzua jarriko da Deba eta Ondarroa artean. Lekeitio eta Deba arteko lotura mikrobus gehigarri batekin egingo da”. Lekeitiotik datozenek, berriz, autobusez aldatu beharko dute Txanbolingo biribulguneko geralekuan, eta mikrobusa hartu Debaraino. Gogorarazi dutenez, anezka zerbitzua doakoa izango da, eta Urazamendiko erabiltzaileei ere emango die zerbitzua. Ondarroatik, esaterako, 15 minutu lehenago irtengo dute mikrobusek. Autobus aldaketa Debako aparkalekuan egingo da, segurtasuna bermatzeko gordetako gunean. “DB03 Lekeitio-Donostia lineako erabiltzaileek autobus aldaketa Debako Alameda geralekuan egingo dute Donostiako noranzkoan, eta aparkaleku sarrera ondoan Lekeitioko noranzkoan”. Lurraldebusek nabarmendu duenez, anezka zerbitzu nahikoa ipiniko dituzte erabiltzaile guztientzako. Informazio gehigarria behar dutenek doako 900 300 340 telefono zenbakira deitu dezakete. Autobus zerbitzu berriaren ordutegia
