Erroak Loran jaia ospatuko dute Berriatuan

Mikel Santiso

2018/11/20

Berriatuarrek berriatuarrentzat antolatutako jaia beste behin ospatuko dute zapatuan, Erroak Loran jaialdia. Herritarren parte hartzean oinarritzen den jaia da eta aurten ere horrela izango da. Ekitaldi nagusia eta herritar gehien batuko dituena zapatuko bazkari herrikoia izango bada ere, eguna iritsi orduko egongo da giroa zelan berotu.

Herritarrak janaria zerbitzatzen, iazko bazkarian.

Mendibarren frontoiko bazkari herrikoian indar jana egingo dute berriatuarrek eta txartelak azaroaren 22ra arte [eguena] egongo dira salgai udaletxean; 300 bat lagun espero dituzte 14:30 aldera hasiko den jatorduan. Helduen txartelak 20 eurokoak izango dira eta 16 urtetik beherakoenak 5 euro. Lehenengoek indiarrak, sakramentuak, postrea eta kafea edukiko dituzte eta gazteenek paella. Aurretik, goiza girotzeko Tarineko Trikipand taldeko kideak ariko dira. Goikolau saria. Erroak Loran jaialdia ospatzen den bezperan eman ohi du izen bera daraman Goikolau saria ere. Aurtengoan kofradak sarituko dituzte, “egoerarik indartsuenean ez badaude ere, garai batean kofradiak jokatu izan duten paper garrantzitsuarengatik“. “Euskaldunok gure historiako gorabehera denetan beti izan dugu batzeko, laguntzeko grin bat”, esan dute antolatzaileek. Horren harira, abenduaren 2ra arte auzoetako jai eta kanpai erakusketa egongo da Goikolau aretoan, barikuetan 19:30etik 20:30era eta asteburuan 12:30etik 13:30era. Bestalde, barikuan [azaroak 23] 19:30ean kofraden ganeko berbaldia eskainiko du Abel Ariznabarretak bideo gelan eta ondoren Kanpai deiak dokumentala eskainiko dute eta ondoren saria emango diete aurtengo omenduei. IAZKO ARGAZKI GALERIA: