Pala txapelketak emozioz betetako hasiera eman dio Akerbeltz gaztetxearen 10. urteurren jaiari
Markina-Xemeingo Gazte Asanbladak antolatutako pala txapelketa herrikoiaren finalak jokatu dira gaur goizean [abenduak 1] Akerbeltz gaztetxearen 10. urteurrenaren baitan. Ikusmina eragin dute finalek, eta jende asko hurreratu da frontoi txikira finalistak animatzeko.
Bigarren mailako finala jokatu dute lehenengo Jose Luis Mendikute Arrizubietak eta Jon Mikel Goienetxea Urkaregik osatutako bikoteak eta Ekain Idigoras Azpiazuk eta Iker Berean Merinok osatutakoak. Beroketak eginda hasi dute norgehiagoka bizia. Bikoteak ez zeuden garaipenari ihes egiten uzteko prest, eta beraz, tanto guztiak borrokatu dituzte. Azkenean, Idigoras eta Bereaurentzat izan da garaipena, 25-15 nagusitu dira.
Lehenengo partida amaitu eta berehala irten dira berotzera lehen mailako finalistak: Pello Urionabarrenetxea Zaldunbide eta Jon Onagoitia Urionabarrenetxea alde batetik, eta Eneko Larruskain Gandiaga eta Jon Meabebasterretxea Bustindui bestetik. Lehia gogorra egon da lehen mailan ere 5 tantora, 8ra eta 9ra ere berdindu dute bikoteek, baina hortik aurrera tantuak pilatzen hasi dira Larruskain eta Meabebasterretxea, 9 tantoko aldea (11-20) ere atera diete Urionabarrenetxea eta Onagoitiari. Hala ere, lehiak ez du etenik izan eta 20-22ra hurreratzea lortu dute Urionabarrenetxea eta Onagoitiak. Baina, azken tantoak ere Larruskain eta Meabebasterretxearentzat izan dira. 25-20 irabazi dute.
Erakusketa. Pala txapelketagaz gainera, Akerbeltz gaztetxearen 10 urteetako irudiak ere ikusteko aukera egon da Plazabarripean. Argazki erakusketa bat jarri dute gaztetxearen garapena eta bizipenak gogora ekartzeko.
Bazkaririk ez baina, Gazte Eguneko bideo emanaldia edukiko dute gauean, Akerbeltz gaztetxean. Eta egunari amaiera emateko, kontzertuak egongo dira Akerbeltzen, 22:30etik aurrera. Mocker’s eta Parrapas taldeen doinuak entzun eta karaokeagaz emango diote giroa gauari.
Bigarren mailako finalistak Jon Mikel Goienetxea Urkaregi, Jose Luis Mendikute Arrizubieta, Ekain Idigoras Azpiazu eta Iker Bereau Merino.
Lehen mailako finalistak: Jon Onagoitia Urionabarrenetxea, Pello Urionabarrenetxea Zaldunbide, Jon Meabebasterretxea Bustindui eta Eneko Larruskain Gandiaga.
Plazabarripeko argazki erakusketa.
