«Bilduma bat egin nahi nuke Euskadiko Orkestra Sinfonikoarekin batera»
Getaria, Orio, Pasaia eta Hondarribiako abesbatzak asmo berarekin batu ditu musikari mutrikuarrak 'Biga' lanean: euskal kantu herrikoiak bigarren bilduma batean batzea.Duela bi urte kaleratu zuen Baga, itsas ertzeko euskal soinuak lana Axular Arizmendi...
Getaria, Orio, Pasaia eta Hondarribiako abesbatzak asmo berarekin batu ditu musikari mutrikuarrak ‘Biga’ lanean: euskal kantu herrikoiak bigarren bilduma batean batzea.
Duela bi urte kaleratu zuen Baga, itsas ertzeko euskal soinuak lana Axular Arizmendi musikari eta ekoizle mutrikuarrak, eta, orain, kresalak zipriztindutako Biga, itsas ertzeko euskal doinuak lanarekin dator esku artean.Oraingoan ere kostaldeko herriak aukeratu dituzu.
Proiektu honen gakoa Euskal Herriko kostaldeko marinel herriak batzea da. Eta poliki-poliki galtzen ari diren kanta historiko horiek berreskatu nahi izan ditut bilduma batean, etorkizunerako ere jasota lagatzeko; hori izan da nire asmoa.
Noiz hasi zinen bigarren proi- ektu honekin?
Ia urte bat eman dugu lanean. Proiektu hau guztia koordinatzea ez da batere erraza. Bilerak egin behar dira udalekin, herriko abesbatzak aktibatu, kantuak adostu, eta horiek denak orkestraziorako moldatu behar izan ditu Ramon Perez Laspeñasek… Azkenean, 500 pertsonatik gora izan dira Biga-n parte hartu dutenak, eta horrek denak koordinatzeak ere lana dakar. Nik, egia esan, asko gozatu dut lan hau egiten. Proiektuan parte hartu duten herritarrek, izan ere, ilusio eta gogo handia ipini dute kantatzerako orduan.
Lau herri batu dituzue kantuan, zenbat kantu abestu ditu bakoitzak?
Aurrekoan egin modura, oraingo honetan ere hamabi kantu jaso ditugu bilduman; herri bakoitzak itsasoarekin edo arrantzarekin zerikusia duten hiru euskal kantu herrikoi aukeratu ditu.
Zeintzuk?
Oriotarrek Balearen bertsoa, Arrantza eta Bertso txiki bat aukeratu dituzte; getariarrek A Getaria, Gora Elkano eta lau bat kantuz osaturiko Pupurria; hondarribiarrek Arraunak bizkarrian, Agur Hondarribi eta Azken portuan, eta pasaitarrek, azkenik, San Pedro bodegoia, Arraunlariak eta Zortziko de las bateleras.
Orkestrazioari dagokionez, zelan egin duzue?
Digitalki egin dugu orkestrazio guztia, filmetako soinu banda baten itxura emanez. Estudioan instrumentu batzuk soltean grabatu baditugu ere, gehiena digitalki sortu da programa oso sofistikatu baten bidez. Ramon Perez Laspeñasek filmetako soinu bandak sortzen ditu, eta bigarren lan honetan ere bera arduratu da horretaz.
Kantuak biltzeaz gain, ikus-entzunezkoa ere jaso duzue.
Kostaldeko kantu ondareari buruzko erreportaje bat ere jaso nahi izan dugu. 50 minutuko dokumentala egin du Eneko Elezgarai mutrikuarrak. Bertan, lau herrietako hainbat herritarrek parte hartu dute. Besteak beste, marinelak izandakoak, udal kultur teknikariak… prozesuan parte hartu duten jendeak parte hartu du dokumentalean. Herri bakoitzari buruzko hainbat zehaz- tapen, itsasoan bizitako bizipen berri, kantei buruzko hainbat datu, kantu horrek zer suposatzen duen herriarentzat eta noiz kantatzen den jaso ditugu beste kontu askoren artean.
Lana non lortu daiteke?
Argitalpen mugatua izan da; herri bakoitzean 500 bilduma banatu dira. Guztira, 2.100 kopia egin dira, horietatik 100 Mutrikun saldu dira. Izan ere, Baga-n parte hartu zuten askok bazuten lan hau ezagutzeko interesa eta. San Tomas azokan saldu ziren ale batzuk, baina, oraindik, Aparra jantzi dendan aleren bat edo beste eros daiteke.
Bigarren lan honen atzetik hirugarrenik etorriko al da?
Laster Donostiako udal ordezkariekin hasiko gara berbetan, eta gure asmoa datorren urtean Higa Donostian grabatzea da. Hiriburuen kasuan, bilduma osoa bertako kantuez osatuko dugu. Aurrera begira, Iparraldeko herri batzuk batu nahi nituzke Laga bilduma osatzeko. Ondoren, Busturialdeko kostaldeko herri garrantzitsuenak hartu- ta, Boga egin nahiko nuke. Azkenik, Bilborekin bukatu nahiko nuke Sega lana. Hori da nire asmoa aurrera begira; proiektu honen bidea hori izango litzateke, baina ikusi egin beharko da ea zer ahal dugun lortu. Proiektuaren bukaeran, berriz, aurreko proiektuetan parte hartu duten herri guztiak batu nahi nituzke. Bilduma bat egin nahiko nuke Euskadiko Orkestra Sinfonikoarekin batera eta Euskadiko orfeoi profesionalarekin. Horixe da nire ametsa.
Lan horiek guztiak egitea noiz bururatu zitzaizun?
Baga kaleratu ondoren proiektua jende askori gustatu zitzaiola ikusi nuen, eta proiektua zabaltzea pentsatu genuen.
Diskoen izenak bereziak dira.
Egia esan, izenak Ion Bergara diskoaren diseinatzaileari bururatu zitzaizkion, eta asko gustatu zitzaidan bere ideia. Modu honetara, gainera, Mikel Laboa zenari keinu bat egin diogu. Laboa artista maitea da niretzat.
