85.000 pertsona inguru batu dira Bilbon eta Baionan, euskal presoen eskubideen eta bestelako espetxe politika baten alde
Orain presoak manifestazioa Bilbon. Argazkia: Hitza Milaka herritar batu dira Bilbon eta Baionan, beste behin ere, euskal preso politikoen eskubideen alde. Elkartasun erantzun zabala eduki dute bi mobilizazioek; antolatzaileek emandako lehen datuen arabera, euriari aurre eginez 76.000 lagun inguru batu dira Bizkaiko hiriburuan eta 9.000 Lapurdiko hiriburuan euskal preso politikoak etxeratu ditzatela eskatzeko.
17:00etan hastekoak ziren martxak, baina, atzerapenagaz hasi dira. Manifestazioaren buruan Orain presoak lelo beragaz eta aldi berean hasi dira protestak oihu eta txalo artean, 17:25ean, Bilboko Casillatik eta Baionako Errepublika plazatik. Elkarbizitza eta bakea oinarri izango dituen etorkizun baten alde mobilizatu dira.
Ondarroako presoen senideak, Bilboko manifestazioan. Argazkia: Hitza
Manifestazioekin bat egin duten herritarrek eta eragileek bestelako espetxe politika bat eskatu diete Espainiako eta Frantziako gobernuei. Presoen eskubide urraketarik ez dutela nahi aldarrikatu dute, eta presoei eta haien senideei elkartasuna eta atxikimendua adierazi nahi izan diete bateko zein besteko mobilizazioetan batu direnek. Presoak kalera, amnistia osoa, Euskal presoak etxera! edo Iheslariak etxera! leloak ozenki entzun dira presoen eskubideen aldeko martxetan.
Kalerik kale ibilbidea osatu ostean, Bilboko protesta udaletxe aurrean amaitu da, eta Baionakoa, berriz, Xaho plazan. Sakabanaketa politikarekin amaitu behar dela agertu dute bukaerako ekitaldietan.
Bakea, bizikidetza eta demokrazia. Baionako manifestazioaren amaieran, esaterako, elkarrizketekin jarraitzeko eskatu diote Parisi. “Konfiantzaren haria berriz lotu behar da”.
Anaiz Funosas Bake Bideako bozeramaileak nabarmendu duenez, ETAren armagatzearen eta desegitearen ondotik, orain euskal presoen auziari konponbidea emateko garaia dela. Funosasek “iragan minberari” aurre egitera eta “denontzat etorkizun hobe bat” eraikitzera deitu du. “Denon ardura da”, gaineratu du.
Espetxe politika normala behar dela esan dute, ez salbuespeneko espetxe politika
Bilbon, aldiz, Euskal Herria Bakea, bizikidetza eta demokrazian sartu dadin eskatu dute bukaerako ekitaldian. “Gaur gizarte honek berriro erakutsi du gure pentsaera politiko ezberdinek ez dutela giza eskubideen defetsa irmoa oztopatzen, bizikidetza ardatz nagusitzat hartzen duen gizarte justu baterantz egin nahi baitugu bidea”, agertu du Pili Kaltzada kazetariak.
Orain presoak manifestazioa Bilbon. Argazkia: Hitza
Espetxe politika normala behar dela esan dute, ez salbuespeneko espetxe politika. “Urruntze politikan presoen eragiten dien egun bakoitza, presoen eragiten dien egun bat da”. Preso gaixoak ere gogoan izan dituzte. “Noiz arte espetxe politika mendekatu hau?”. Senide, preso eta herbesteratuei elkartasuna erakutsi diete. “Legea betetzea, hori besterik ez dugu ozen eta garbi aldarrikatzen”.
Kaltzadak salbuespen neurriekin amaitzea eta legedi arruntaren aplikazioa ere eskatu ditu. Hitzaldia amaitu aurretik espetxean diren Kataluniako buruzagi independentistekiko elkartasuna helarazi die, “gaur gure bihotza zuekin dago”. Aldi berean, Altsasuko auzian zigortu dituzten gazteekiko elkartasuna adierazi du.”Beren herriak ikusi nahi ditugu; konspirazio makabro honetatik libre”.
Mikel Laboaren Txoria txori kantuagaz amaitu dute ekitaldia. Koban taldeko Onintza Rojasek, Gose taldeko Ines Osinagak eta Huntza taldeko Josune Arakistainek eman diote doinua kantuari trikitixekin.
