Lea-Artibain hondakin bereziak batzeko puntu mugikorra bidea egiten hasia dago
Herritar bat gas bonbonak eramaten Markina-Xemeinen ipini duten puntu mugikorrera Lea-Artibain hondakin bereziak batzeko puntu mugikorra aurreko astean hasi zen zerbitzua ematen Ispasterren. Eta gaur [urtarrilak 12] goizean, berriz, Etxebarrian eta Markina-Xemeinen bi ordutako geldialdiak egin ditu horretara bideratutako kamioi bereziak. Bilketa egiten aritu diren bi egunak ondo joan direla azpimarratu du Rakel Elu Lea-Artibai Amankomunazgoko lehendakariak. “Zerbitzuak lehen bi egunotan erantzun ona izan du”.
Zerbitzu berriari esker, herritarrek beste inora bota ezin ditzaketen hondakinak bertara eramateko aukera dute. Eluk nabarmendu duenez, “modu honetara, etxebizitza batean sortu daitezkeen hondakin guztiak kudeatzeko gai izango da Amankomunazgoa”.
Lea-Artibaiko herritarrek zapatuero eskura edukiko duten zerbitzu bat izango da, eta Amankomunazgoko ordezkariak gaineratu duenez, herritarrek euren herrietan ez eze, kamioia beste herriren batera joaten denean ere erabili dezakete zerbitzua. “Denontzat ondo datorren zerbitzua da, hobekuntza handia da. Egia esan, premiazkoa zen”. Bestelakoan, aste barruan irekita dauden Berriatuko Milloi auzoan eta Markina-Xemeingo sarreran dauden garbiguneetara joan daitezke herritarrak.
Herritar bat butano bonbonak eramaten, gaur goizean Markina-Xemeinen egon den puntu mugikorrera
Puntu mugikorretan, besteak beste, aerosolak, gai arriskutsuen ontziak, margo eta disolbatzaileen ontziak, autoen iragazkiak, pilak, bonbilak, bateriak, tonerrak, ordenagailuak, irratiak, zartaginak, fluoreszenteak, botikak, erradiografiak, CDak, bideoak, boligrafoak, errotulagailuak, idazteko materialak, motorreko olioa edo bonbonak laga daitezke. Jasotzen diren gaiei buruzko edozein argibide argitu nahi izanez gero, kamioiaz arduratzen den langileari galdetzeko aukera ere badago.
Amankomunazgoak jasotzen dituen gaiak gero, sailkatu eta, beste toki batzuetara bideratuko dituzte, hitzarmen bidez. Bonbonak, esaterako, Gas Garin enpresara bideratuko dituzte. Margo hondakinei dagokionez, horiek kudeatuko dituen enpresa baten bila ari dira. Fluoreszenteak, aldiz, Ambilamp-era bideratuko dituzte. “Horiek bideratzeagatik, gainera, dirua bueltatuko digute, handia ez bada ere”.
Plastikozko tapoiak. Eluk jakitera eman duenez, bestalde, plastikozko tapoiak ere jasoko dituzte zerbitzu ibiltariaren bidez. “Tapoiak edukiontzi horira bota ordez, puntu mugikorretan jasoko ditugu. Aparteko leku batean bereizita lagako ditugu, eta horiek gero, beharrezkoak diren proiektuetara bideratu ahal izango ditugu”.
Zerbitzu ibiltariari esker etxeko “traste” txikiak jasoko dituzte. Tamaina handiagoko “traste zaharrak” berriz, horretara bideratutako doako zerbitzua erabiltzeko gomendatu dute, baina horretararako, txanda hartzea derrigorrezkoa dela gogorarazi dute. Zerbitzua erabili nahi dutenek ezinbestekoa dute 900 10 48 78 doako telefonora deitzea. “Txanda hartu barik ezin da ezelako trasterik kalera atera“.
