Lekitto Bedarrak Usotegiko ortua udaberrirako prestatzeko auzolana antolatu du
Urtarrilaren 19rako deitu dute auzolana, 10:00etatik 12:00etara, eta zereginen artean, belarra moztu, baratze alor batzuk prestatu, idarrak eta babak erein eta konpost gunea txukunduko dute.
Urtarrilaren 19rako (zapatua) deitu du auzolalana taldeak, 10:00etatik 12:00etara. Egun berean, Lekeitioko Udalaren laguntzagaz erositako belarra mozteko tresneria jasoko dutela jakitera eman dute Lekitto Bedarreko kideek, eta auzolana egiten hasi aurretik, makinaren erabilera eta mantenimenduari buruzko ikastaro bat jasoko dute hornitzailearengandik. “Ekipamedu horretan, haizezko aparailua ere egongo da, eta horrek eskailera eta inguruak txukun garbitu eta mantentzen lagunduko digu”.
Makina berriekin, zelaiko eta ortuko belarra moztuko dute, eta era berean, baratzeko alor bi mantxan jarriko dituzte, udaberriko haziak ereinez; babak eta idarra, hain zuzen.
Auzolana, gainera, auzoko konpostagailuan nahasketa egokiak egiteko eta erabilgarri den ongarria lurrean nahasteko baliatuko dute. Horren harira, konpost gunea erabiltzen duten herritarrak animatu dituzte euren konpromisoagaz jarrai dezaten. “Urtero 800-1.000 kilo konpost inguru egitea lortzen da, eta era natural eta sostengarri batean, herrian geratzen da aberastasun hori guztia”.
