Abokatu kristauek Fiskaltzara eramango dute Ondarroako gurutze frankistaren eraistea
Espainiako Abokatu Kristauen Elkartearen iritziz Ondarroako monumentu frankista eraistea batetik, "gorroto delitu" bat da, eta, bestetik, "sentimendu erlijiosoen aurkako delitua eta kalteak eragitea".
Ondarroa, monumentu frankista eraitsita. Argazkia: Ondarroako Udala Espainiako Abokatu Kristauen Elkarteak jakitera eman duenez, Fiskaltzaren aurrean salatuko dute ekintza. Elkartearen iritziz, Ondarroako monumentu frankista eraistea batetik, “gorroto delitu” bat da, eta, bestetik, “sentimendu erlijiosoen aurkako delitua eta kalteak eragitea”.
Polonia Castellanos elkarteko presidenteak “lehenbailehen antzeko monumentu bat eraikitzeko” eskatu du, eta azpimarratu duenez, gurutze batek ezin du inolaz ere memoria historikoaren legea urratu. Eusko Jaurlaritzak, bestalde, monumentua kentzeko eskaria egina zion Ondarroako Udalari; izan ere, Arta muturreko begiratokian zegoen monumentuak ez zuen memoria historikoaren legea betetzen.
Castellanosek nabarmendu duenez, “eraisketa egun argiz egin zen, hainbat ordu iraun zuen eta inork ez zuen ekintza gelditzeko ezer egin“. Zentzu horretan, Ondarroako Udalari bere lana ez egitea leporatu die. Gogorarazi duenez, gurutzeak aurretik ere hainbat eraso jasan zituen.
Era berean, justiziari esku hartzeko ere eskatu dio Castellanosek, “monumentu erlijiosoak txikitzeko memoria historikoa aitzakiatzat jartzen duten gizarteko sektore laizista horiek ezin baitute inpunitate osoa eduki”.
