Nahia Quincocesek 7. postuan amaitu du Munduko Kopako lehen proba
Zirkuitu ikusgarri batean zehar egin zuten lasterketa; eguraldi txarragatik, elurte handiengatik eta parte hartzaileen segurtasuna bermatzeko, gainera, ibilbidea aldatu egin behar izan zuten
Nahia Quincoces Munduko Kopako lehen jardunaldian parte hartzen. Argazkia: Jesus Dyañez Eskiatzaile mendexarrak Mendiko Eskiaren Munduko Kopako lehen jardunaldian parte hartu du Bischofshofen-en (Austria) asteburuan. Bariku [urtarrilak 18] arratsaldean esprint proban parte hartu zuen eta domekan [urtarrilak 20], berriz, banakako lasterketan. Bi kategorietan emaitza onak lortu ditu.
Banako lasterketa 7. amaitu zuen 1.17.42 denboragaz. Zirkuitu ikusgarri batean zehar egin zuten lasterketa; eguraldi txarragatik, elurte handiengatik eta parte hartzaileen segurtasuna bermatzeko, gainera, ibilbidea aldatu egin behar izan zuten. Quincocesek nabarmendu duenez, “gustura” ibili zen zirkuituan. “Goruntz ondo sentitu nintzen, indartsu. 7. postuagaz oso pozik nago”.
5. postuaren lehian hiru eskiatzaile ibili ziren, eta horien artean egon zen eskiatzaile mendexarra Guilia Murada eta Marta Garciarekin batera. “Eurek ni baino trantsizio hobeak egin zituzten eta jaisten ere hobeto ibili ziren”.
Esprint lasterketari dagokionez, sailkapen fasean geratu zen, finalerdietarako atarian. Finalerdietara sailkapen faseko lehen hamabiak sailkatu ziren, eta mendexarrak 13. amaitu zuen. “Segundu bat baino gutxiagogatik ez nintzen hurrengo fasera pasa, ehuneko gutxi batzugatik kanpoan geratu nintzen”. Finalerdietara igarotzeko aukerarik eduki ez bazuen ere, “pozik” agertu da Quincoces. “Ez nintzen oso fin ibili. Akats tekniko batzuk egin nituen”.
Denboraldiko lehen jardunaldia kontuan hartuta, sasoiko dagoela erakutsi du Nahia Quincocesek. Bide honetik hasi du denboraldia, eta aurrera begira zer hobetu baduela agertu du. “Ea hurrengo asteotan hobetzetik badudan”.
Datorren astean Andorran jokatuko dute Munduko Koparen bigarren jardunaldia. Font Blancako txapelketan bakarkako eta igoera bertikal lasterketetan parte hartuko du mendexarrak.
