Ondarroako Nasa Kaleko lanek aldaketak eragingo dituzte Udalbusean
Nasa kaleko lanak direla eta, Ondarroako zirkulazioa berbideratuko dute, eta horrek ere hainbat aldaketa eragingo ditu udalbus zerbitzuan.
Nasa kaleko 3tik 19rako tartean lurra konpondu eta asfaltatzeko lanak hasi dituzte gaur [urtarrilak 21], eta horrek hainbat aldaketa eragin ditu Ondarroako zirkulazioan. Udal iturriek jakitera eman dutenez, zirkulazioa berbideratzeak ere hainbat aldaketa eragingo ditu udalbus zerbitzuan.
Aurreikuspenen arabera, lanak martxoaren 3a aurretik amaituko dituzte, baina, bien bitartean, udalbusa ezingo da Alde Zaharretik igaro. Hori dela eta, geltoki batzuk tokiz aldatuko dituzte behin-behinean. Nabarmendu dutenez, Kamiñazpitik Artara doazen autobusen geltoki bi aldatuko dituzte lekuz; “aurkako norantzakoek leku berean jarraituko dute”.
Erribera kaleko 9tik 17rako tartea (Zubi Barritik Zubi Zaharrerako tartea) norantza biko bidea duen karga-deskarga gunea bihurtuko da hurrengo asteotan, eta autobusak ezingo duenez bertatik igaro Zubi Zahar pareko geltokia Musika Eskolaren parera aldatu dute. Autobusak, ondoren, Zubi Barria igaro, eta kanpoko aldetik egingo du ibilbidea, portuko guneraraino. Alamedan ere ez da geldituko autobusa. Geltoki horren ordezkoa Augustin Zubikarai parean ipini dute.
