Jon Gurrutxagak azken lana aurkeztuko du Mutrikuko Gaztetxean
Gurrutxaga Urbil Artola hondarribiarrarekin igoko da taula gainera; Artolak dobro eta steel gitarra ezberdinak joko ditu.
Urbil Artola eta Jon Gurrutxaga. Argazkia: Jon Gurrutxaga Facebook Musikari elgoibartarrak Kateak azken lana aurkeztuko du barikuan [urtarrilak 25] Mutrikuko Gaztetxean. Zuzenekoa, gainera, biko formatuan izango da; oholtza gainean Urbil Artola hondarribiarrak lagunduko du dobro eta steel gitarra ezberdinekin. Gazte Asanbladak antolatutako kontzertua 23:00etan hasiko da; sarrera 3 euro izango dela aurreratu dute.
Astebururako beste hainbat jarduera antolatu dituzte Gazte Asanbladako kideek. Zapatuan [urtarrilak 26], esaterako, Gaztetxea auzolanean garbitu eta atonduko dute. Horretarako bi txanda antolatu dituzte, lagundu nahi duten guztiei aukera zabaltzeko; goizeko txanda 10:00etatik 14:00ak aldera arte egingo dute, eta arratsaldekoa, berriz, 16:00etan hasi eta amaitu arte.
Gaztetxea garbitu eta atontzeko deialdia herri mailan egin dute; nahi duen guztiek parte hartu ahalko dutela azpimarratu dute. “Deialdia ez da soilik asanblada osatzen dugunontzako, edozeinek etortzeko aukera edukiko du”.
Domekan [urtarrilak 27], azkenik, haur eta guraso asanbladak antolatuta, mozorro festa egingo dute. Ekintza 17:00etan hasiko da, eta mozorro festaren gaia librea izango dela aurreratu dute. “Bakoitzak etxetik ekarritako arroparekin jolastuko dute”.
