Nahia Quincocesek 5. postua lortu du Andorran
Lasterketa bertikalean emaitza bikaina lortu du eskiatzaile mendexarrak. Bakarkako proba, berriz, 8. postuan amaitu du.
Nahia Quincoces, Andorran. Argazkia: Jesus Dyañez / Dymages Mendiko Eskiaren Munduko Koparen bigarren jardunaldia jokatu dute asteburuan, Font Blancan (Andorran). Nahia Quincoces Altuna eskiatzaile mendexarrak banakako eta lasterketa bertikalean parte hartu du. Lasterketa bertikalean 5. amaitu du, eta banakakoan, berriz, 8.
Lasterketa bertikala Andorrako Arcalis herriko Arinsal eski estazioan jokatu zuten domekan [urtarrilak 27]. Emakumezkoen lasterketa oso lehiatua izan zen, emozioz betea. Quincocesek 35.31 denbora lortu zuen, eta segundo gutxi batzugatik, metalen bat lortzeko aukera barik geratu zen.
Lehenengo bosten artean sailkatu delako pozik dagoela aitortu du eskiatzaile mendexarrak. Lasterketaren zatirik gehiengoa 4. postuan joan zen, eta momenturen batean 3. postuan ere joan zen, baina postu horri ezin izan zion eutsi. “4. amaitu ahalko nuela pentsatzen nuen, baina helmugara heldu baino pixka bat arinago, atzetik zetorren Marta Garciak aurrea hartu zidan. Azken esprintean, gainera, 6. postuan zetorrenak ia-ia aurrea hartu zidan”.
Nahia Quincoces, eskuman, lasterketa bertikaleko podiumean. Argazkia: Nahia Quincoces
Lasterketa bertikala gogorra izan bazen ere, oso ondo sentitu zela eta azken esprintera arte dena eman zuela nabarmendu du. “Ezagutzen nuen lasterketa bat da. Aurten, beste urte batzuetan baino hobeto neurtu ditut indarrak. Ez badituzu ondo neurtzen, hustu egin zaitezke, eta horri buelta ematerik ez dago”.
Zapatuan [urtarrilak 26], berriz, banakako proban parte hartu zuen. Lasterketa nahikoa teknikoa izan zen, eta asko sufritu bazuen ere, asko gozatu zuen, eta gustura geratu da egindako lanagaz. “Polita izan zen, eta ibilbideak joko asko eman zuen”. 8. postua eskuratu zuen Quincocesek; 01.50.01 denbora behar izan zuen helmugaratzeko. “Aurreko astean baino gusturago eta indartsuago sentitu nintzen bakarkako proban”. Agertu duenez, proba oso zirraragarria izan zen. “Lau bat pertsonako taldea erdi batera joan ginen. Gitxi falta zela, 7. postuan nengoen, baina azken aldaketan postu hori galdu nuen”.
Munduko Koparen hurrengo geldialdia Frantzian izango da. Quincocesek bakarkako lasterketan eta esprint lasterketan parte hartu du asteburuan.
