Aurrerak Bilbao Athleticen aurkako partidua jokatuko du
Aurrerako gizonezkoen lehen taldeak Aritz Solabarrieta Arantzamendi ondarrutarrak zuzentzen duen Bilbao Athleticen aurkako lagunarteko partidua jokatuko du martitzenean [martxoak 5], 18:00etatik aurrera, Zaldupe udal futbol zelaian. Talde ondarrutarreko zuzendaritza taldeak zaleak partidua ikustera eta beste behin ere harmailak betetzera gonbidatu ditu; “Inauteri eguna gozatzeko aukera bikaina da”.
Talde zuri-gorriaren entrenatzailea ondarrutarra izanik, bilbotarren aurka partidu bat jokatzea polita izango zela iruditu zitzaien Aurrerako ordezkarei. Solabarrietagaz harremanetan jarri ostean, baiezkoa jaso zuten. “Talde biak jokoan ikustea polita izango da”.
Talde ondarrutarrak, bestalde, ligako partidua jokatuko du zapatuan [martxoak 2], 17:30ean, Getxoren aurka, Faduran. Partidu garrantzitsua izango da. Aurrera 3. postuan dago 40 puntugaz, eta Getxo atzetik dute, 4 puntu gutxiagogaz. Irabaziz gero, atzetik datozenen arteko abantaila handituko lukete.
