Ondarruk eta Isuntzak lan bikaina egin dute Bizkaiko Batel Ligaren IV. jardunaldian
Zaleen animo artean, etxekoek lau garaipen era lekeitiarrek garaipen bat eskuratu dute Ondarroako uretan jokatu duten erlojupekoan.
Kafeatzetik hasi eta Saturraraineraino zaleen animoak jasoz jokatu da gaur [otsailak 2], Bizkaiko Batel Ligaren IV. jardunaldia. Ondarroak 22 eta Isuntzak 15 batel uretaratu dituzte. Gaurkoa erlojupeko proba izan da, eta lau kategoriatan banatuta aritu dira arraunlariak: alebin, txiki, kadete eta gazteak; 500, 1.000, 1.500 eta 2.000 metro osatu behar izan dituzte, hurrenez hurren.
Alebin mailan, etxeko batelak izan dira denbora onena egin dutenak emakumeetan. Ondarroa Ak irabazi du (02.40.04), Isuntza B sailkatu da bigarren (02.48,61) eta Ondarru C sartu da hirugarren (02.50,92). Gizonetan ere etxekoak nagusitu dira. Ondarru Bk (02.36,54) eskuratu du garaipena, Isuntza A (02.36,59) eta Zierbenak (02.40,54) baino denbora hobea eginda.
Isuntzako mutilak, erlojupekoan.
Ondarrutarrek lan bikaina egin dute txikien mailan ere, eta garaipena eskuratu dute emakumeetan: Ondarru B (02.44.41) nagusitu da. Atzetik sartu dira Isuntza A (02.45,77) eta Arkote A (02.49,38). Gizonezkoei dagokienez, lekeitiarrak izan dira onenak. Isuntza A (02.33,88) eta Isuntza B (02.40,18) izan dira lehen bi sailkatuak, estropada borobila eginda, eta haien atzetik, hirugarren, Deustu A sailkatu da (02.50,96). Ondarru A bosgarren geratu da (02.53,04).
Eskualdeko ordezkaritzak kadete mailako lehen hiru sailkatuen artean egotea lortu du. Emakumeetan Isuntza A hirugarren sailkatu da (04.12,50). Lehen eta bigarren postua Kaiku A (04.01,85) eta Kaiku Brentzat izan dira (04.05,60). Ondarru A bosgarren sailkatua izan da (04.14,45). Kadete gizonen kategorian ere emaitza oso ona lortu dute lekeitiarrek. Kaiku A izan da azkarrena (03.44,02), Isuntza A bigarrena izan da (03.48,24) eta Bermeo A izan da hirugarrena (03.52,42). Etxeko batelak, Ondarru A eta Ondarru B hamargarren (03.58,34) eta hamazortzigarren sartu dira (04.53,22).
Gazte mailan, emakumeetan, Ondarroako bi batel aritu dira bakarrik, Ondarru A eta Ondarru B. Lehen batelak irabazi du (05.30,71). Bigarrenak 05.34,79ko denboran osatu du ibilbidea. Gizonezkoetan, berriz, ez da eskualdeko ordezkaririk egon. Zierbenak irabazi du erlojupekoa, 04.46,36ko denboragaz. Deustu A eta Arkote A izan dituz atzetik.
