Klima aldaketak antxoari mesede egingo diola dio Aztiren ikerketa batek
Zentro teknologikoaren azterketek diagnostiko baikorra eskaintzen dute Bizkaiko golkoko antxoarentzat.
Antxoa harrapatu berriak kaxa batean, Ondarroako portuan Azti zentro teknologikoa ikerketa bat gidatzen ari da beroketa globalak euskal arrantzaleen intereseko arrantzatokietan dituen ondorioiei buruz. Eta txostenak dioenaren arabera, klima aldaketak nolabaiteko mesedea egin lioke Bizkaiko golkoko antxoari, “espezie horren banaketa gune tropikaletatik epeletara hedatzen baita”.
Zentro teknologikoaren azterketek diagnostiko baikorra eskaintzen dute Bizkaiko golkoko antxoarentzat, izan ere, aurreikusten da, XXI. mendeak aurrera egin ahala, arrautzen ekoizpena eta erruteko guneak handitu egingo direla. Guillem Chuste Aztiko klima aldaketaren adituaren iritziz, antxoak “itsasoaren beroketari dion tolerantzia handia da”. Azterketak dio espezie hori erresistentea dela, eta, are gehiago, fenomeno horrek mesede egin diezaioke inguruotan, nahiz eta beste pelagiko batzuekin lehiatu beharko den.
Gainera, azterketak erakutsi du antxoaren errunaldia hamarkada bakoitzean 6 egun aurreratu dela 1987tik. Beste faktore batzuen artean, itsasoaren tenperatura eta geruza desberdinen nahasketa hartu behar da kontuan.
Aztiko klima aldaketaren adituak azaldu duenez, azterketaren asmoa da klima aldaketak arrantzatokietan izango dituen eraginei aurrea hartzea. “Dagoeneko hauteman dugu ozeanoko goiko geruzen beroketa nabarmen eragiten ari dela. Arrain espezie batzuk poloetarantz lekualdatu dira, Bizkaiko golkoan ur beroagoetako espezieak sartu dira, eta ur hotzagoetakoak murriztu, baita ere migrazioaren sasoikotasuna aldatu da”.
Chustek gaineratu duenez, lekualdaketa bertikal bat ere gertatzen ari da. “Sakoneran ur hotzagoak bilatzeko, eta baita ere ur zutabearen estratifikazio termiko bat ere, eta horrek plantonaren biomasa urritzea eragingo du. Horrek guztiak eragina izango du baita ere Bizkaiko golkoko itsas baliabideen ustiapenean, espezie batzuk garaile eta beste batzuk galtzaile izago direlarik”.
