Redstone Replay musika jaialdia, apirilaren 27an Ondarroan
Euskal Herriko hamabi musikariz osatutako kartel indartsua aurkeztu dute: Naroa, Larry Bird, Keu Agirretxea, Jon Gurrutxaga eta Urbil Artola, Joseba Irazoki, Joseba B. Lenoir, Petti, Miren Narbaiza (Mice), Jon Basaguren, Rafa Rueda eta Klag Klub
Ezkerretik eskumara: Joseba B. Lenoir, Aiert Goenaga eta Jon Basaguren, Beikozini aretoan. Argazkia: Redstone Replay Udazkenetan egiten den Redstone Soluk musika zikloa herrian egonkortu egin dela eta ezarritako helburuak betetzen ari direla ikusita, “jauzi berri bat eman”, eta udaberriko egun bakarreko Redstone Replay jaialdi berria sortu dute. Ekimena apirilaren 27an egingo dute, 18:30etik aurrera, Ondarroako Beikozini aretoan. Sarrerak salgai daude aretoan bertan. Aldez aurretik 12 euro balio dute, eta egunean bertan 15 euro.
Hain zuzen ere, udazkeneko zikloan egon ziren artista guztiak egun bakarrean batuko dituzte jaialdiaren antolatzaileek: Naroa, Larry Bird, Keu Agirretxea, Jon Gurrutxaga eta Urbil Artola, Joseba Irazoki, Joseba B. Lenoir, Petti, Miren Narbaiza (Mice), Jon Basaguren, Rafa Rueda eta Klag Klub. “Udazkeneko zikloa aurkeztean bakoitza banan-banan ekartzearekin pozik bageunden, zer esan orain; abentura berri hau abiatzeko kartel benetan indartsua dugu”.
Aiert Goenaga jaialdiaren arduradunak nabarmendu duenez, ekimena jaialdi batean gorpuztua badator ere, udazkeneko zikloaren izaera mantenduko du taularatzerako orduan. “Formatu aldaketa eman den arren, hastepenetako helburuak mantentzen ditugu: euskal kulturaren transmisioa lantzeko bitarteko eraginkor bat izateko asmoz, herriko kultur eskaintza osatu eta herritarrak euskal musikara gerturatu nahi ditugu”.
Ezkerretik eskumara: Joseba B. Lenoir, Jon Basaguren eta Aiert Goenaga, jaialdiaren kartela eusten Beikozini aretoaren kanpoan. Argazkia: Restone Replay
Goenagak gaineratu duenez, jaialdia herriko eskaintza kulturala aberastera datorren ekimena da, Marabilli, Literatur Amuak, Orrigorri, Redstone Soluk, Sare artin eta beste ekimen batzuekin batera. “Herrian oso ekosistema kultural osasuntsua dugu, eta denon ardura da bakoitzari dagokigun esparrutik hauek zaintzea, kulturgintzaren katebegi bakoitza ezinbestekoa baita katea sendo mantentzeko”.
Proposamenen artean, Joseba Baleztena Lenoir musikari nafarraren zuzenekoagaz gozatzeko aukera izango dute zaleek. Disko berria plazaratu arte ez du kontzertu gehiagorik emango, Ondarroako kasuan ez du “zalantzarik izan salbuespen hau egiteko”.
Beratarraren arabera, mota horretako ekimenak ezinbestekoak dira euskal sortzaileentzako, publikoarekin modu intimistago batean konektatzeko. “Formatu txikia oso aberasgarria da hartzailearentzat; alde batetik, emanaldiaz gozatzeko ematen diren baldintzengatik eta, bestetik, kontzertu osteko hartu-emana egoten delako. Sentsazio eta ideia trukaketa sortzen dira sortzaile eta hartzailearen artean, eta sortzaile eta hartzaile garenontzat oso garrantzitsuak dira honelako komunikazioa errazten duten dinamikak”.
Jon Basaguren musikariak ere parte hartuko du jaialdian. Izaki Gardenak taldeko kantariaren iritziz, euskarak arnasguneak dituen eta behar dituen modura, euskal kulturgintzak, eta kasu honetan musikagintzak, ere behar ditu bereak. “Ondarroa ezinbesteko dugu horretan; are gehiago zuzeneko emanaldiak dekretu bidez mugatu nahi dituzte garaiotan. Azken asteotan Ondarroan bi aldiz jo ostean, oraingoz ez zegoen nire buruan bertora itzultzea, baina ezin nioin ezetzik esan honelako ekimen baten lehen edizioan izateari”.
