Eneko Sagarmendi mutrikuarrak Euskal Pilota Egokituko II. Master Cup txapelketa irabazi du
Errenteriako Mindara klubeko pilotari mutrikuarrak Leire Esnal palista zumaiarrarekin batera osatu du bikotea. 25-17 irabazi diote Sheila Cuetori eta Iraitz Hueguni.
Leire Esnal eta Eneko Sagarmendi txapelak soinean. Argazkia: Mindara Finalari dagokionez, Leire Esnalek eta Eneko Sagarmendik oso partidu sendoa jokatu zuten. Lau aurkariek maila ona erakutsi zuten kantxan. Partidua oso orekatuta hasi zuten; nahikoa berdinduta ibili ziren 9. tantoraino, bederatzina ere berdinduz. Hortik aurrera, aurkariek hainbat huts egin zituzten. “Iraitz Huegunei finaleko presioak gehiago egin zion. Finalean nahi baino huts gehiago egin zituen”.
Atsedenaldia hartu orduko 17-9 irabazten zihoazen Esnal eta Sagarmendi. Eta ondoren, aurkariek huts gutxiago egin bazituzten ere, ondo eutsi zioten aurretik lortutako abantailari, “merezitako garaipena” eskuratuz.
Eneko Sagarmendi garaipena ospatzen. Argazkia: Mindara
Euskal Pilota Egokituko II. Master Cup txapelketaren finala Beasainen jokatu zuten, domekan [apirilak 7]. Antolatzaileek nabarmendu dutenez, Antzitzar pilotalekuko harmailak oso-osorik bete zituzten ikusleek. “Ikusgarritasuna izan da txapelketa honen benetako arrazoia, erabat bete den Antzizar pilotalekuko festa zoragarrian. Kirolariek ere euren alea jarri dute, eta harmailetan eserita egon diren zale bat baino gehiago harritu dituzte jokalariek palaz duten gaitasuna erakutsiz”.
Gurpildun aulkiko finala, berriz, Joseba Lasak eta Beñat Lizasok irabazi zuten. 25-24 irabazi zieten Javier Etxezarreta eta Asier Navaridasi.
Lau finalistak partida hasi aurretik. Argazkia: Mindara
