Inhar Urruzuno harrijasotzaile ondarrutarra, txapeldun 5Kirol proban

Harrijasotzaile ondarrutarrak Aitzol Atutxagaz batera irabazi du herri kirolen txapelketa berritzailea. Xabier Orbegozo 'Arria V.'ari eta Jokin Eizmendiri nahikoa erraz irabazi diete.

Aitzol Atutxa eta Inhar Urruzuno txapelak soinean. Argazkia: Basque Sports

Nerea Bedialauneta Alkorta

Ondarroa

2019/05/01

Harrijasotzaile ondarrutarra eta aizkolari dimoztarra txapelketa irabazteko faboritoak ziren, eta ez dute hutsik egin gaur [maiatzak 1] Bilboko Bizkaia pilotalekuan jokatu den final handian. 41 minutu eta 17 segundotan amaitu dituzte lanak, aurkariek baino 4 minutu eta 18 segundo azkarrago.

Bikote irabazleak txapel bana eta 1.200 euro txekea jaso ditu sari legez. Urruzunok pozik dagoela aitortu du finala amaitzean. “Bost kirol desberdin izan dira. Intentsitate handiko finala izan da, eta gure gogo eta indar guztiekin ekin diogu. Oso ondo moldatu gara biok; elkarri ondo hartu diogu neurria. Mota honetako txapelketa bat sekula ez da egin, eta duda barik pozik nago. Nik estreinako parte hartu dut honelako erronka batean, eta txapela irabazteko, egia esan, oso garrantzitsua izan da indarrak ondo neurtzea, eta buruagaz jokatzea”.

Probari dagokionez, bi bikote aurkariak harri jasotzean, aizkoran, txinga eroaten, ingude altxatzen eta trontzan lehiatu behar izan dute. Egin beharreko lana honakoa izan da: 100 kiloko kopa bat ehun aldiz altxatu lau txandatan (harrijasotzaileak); 45 ontzako hamabi enbor moztu (aizkolariak) lau txandatan; txanda librean, 50 kiloko txinga banarekin hamabi plaza egin; txanda librean, hemezortzi kiloko ingudeagaz 150 ukitu; eta, azkenik, biek batera, 45 ontzako enborrari hamar mozketa egin behar izan zieten trontzarekin.

Inhar Urruzuno eta Aitzol Atutxa trontzako proba amaitu berri garaipena ospatzen. Argazkia: Basque Sports

Urruzuno eta Atutxa II.a aurretik hasi dira, eta abantaila horri eutsi diote amaiera arte. Probaren lehen zatian bikote bakoitzeko parte hartzaileak banaka aritu dira, bakoitza bere modalitatean, eta lau txandak amaitu ostean, minutu inguruko tartea atera diote Arria V.ari eta Eizmendiri. Bikote bizkaitarrak 27 minutu eta 4 segundotan amaitu du lehen zatia eta gipuzkoarrak, berriz, 27 minutu eta 58 segundotan.

Eta hurrengo probetan denbora tartea handitzen joan dira Atutxa eta Urruzuno. “Proba irabazteko gakoa azken zatia izan dela uste dut. Izan ere, trontzan aritzeko zatira besteak baino zer edo zer indartsuago ailegatu gara. Denak ondo irten du, eta txapela janztea lortu dugu. Hori bai, final estua izan da; aurretik nahikoa berdinduta ibili gara. Txingetan, esaterako, soilik bi untzako abantaila izan dugu, eta hori ez da ezer. Indarrak gorde ditugu, eta topera aritu gara trontzan”.

Frontoia jendez beteta egon da. Datuak kontuan hartuta, 800 bat pertsona egon dira harmailetan. “Hainbeste jende harmailetan ikustea pozgarria iruditu zait, gutxitan gertatzen dira horrelakoak. Beti-betiko zaletuez gain, zaletu berri asko ikusi ditut. Eta hori oso garrantzitsua da. Etorri diren zaletu guztiei eskerrak eman nahi nieke, baita antolatzaileei ere. Herri kirolek horrelako bultzada bat behar dutela iruditzen zait, zerbait desberdina eta berritzailea. Ea kirolaren tenkada goraka joaten den”.