Erronka bigaz datoz Amorotoko Oleta auzoko Pazko jaiak
Amorotoko Oletako auzotarrak zapatuan murgilduko dira Pazko jaietan. Beti-betiko osagaiak nahastuta, eskaintza zabalagaz datoz hiru eguneko ospakizunak. Eskualdekoak eta inguruetakoak jaiez gozatzera gonbidatu dituzte.
Amoroton sortu berri duten giza proba taldea. Argazkia: Oletako jai batzordea Berritasun modura, bi erronka berezi egingo dituzte Pazko jaietan baitan, domekan [ekainak 9]. Alde batetik, jai gunean dagoen edozeinek jai batzordekoek egindako desafioari erantzuteko aukera izango du. Honakoa izango da desafioa: auzoan dagoen pisu ezezaguneko berun zati handia ahalik-eta gehienetan altxatzea. “Oletan betidanik egon da berun zati handi bat, eta aspaldi batean egiten zen estilora erronka bat proposatzea erabaki dugu. Plazan dagoen edozeinek parte hartu ahal izango du, eta bost minutuan esku biekin lagunduta altzada gehien egiten dituenak 200 euroko saria irabazteko aukera edukiko du”.
Erronka berritzailearen aurretik, ostera, giza proba desafioa ere egingo dute. Aurtengoa hitzordu bereziagoa izango dela aitortu dute, gainera, Oletako jai batzordeko kideek. Izan ere, Mendaroko taldearen aurka Amoroton sortu berri den giza proba taldeak parte hartuko du estreinako. Talde bakoitzak ordu erdiko saioa burutu beharko du, eta, ohi legez, markarik onena egiten dutenek irabaziko dute.
Herri kirolen desafio ikusgarriez gain, bestelako hainbat ekintza ere badakarte jaiek. Ohiturari eutsiz, auzotar guztiak elkartzen dituen tortilla txapelketa izango da egitarauko lehen ekimena zapatuan [ekainak 8]. Tortillak prestatzeko aitzakiagaz, gaueko kontzertuetarako giroa berotzen hasiko dira kuadrillak. “Parte hartzaileek nahi duten moduko tortilla sukaldatu dezakete; osagaiak libreak dira”.
Iluntzean zelaiaren bueltan prestaturiko arraultza opil goxoak jan eta denbora lagun artean kontu-kontari igaro ostean, Nabil talde lekeitiarraren eta duela gutxi sortu berri den Modus Operandiren ska taldeek kaleratutako azken diskoetako kantuak joko dituzte Oletako oholtza gainean. Eta goizaldeko ordu txikiak arte geratzen direnek Oxabi taldearen erromerian gerriak astintzeko aukera ere edukiko dute.
Ohiturei eutsiz, urtean behin Oletako zelaian ospatzen den mezatan batuko dira auzotarrak domeka eguerdian. Eta jarraian, Arta Nagusi dantza taldeak erakustaldia eskainiko du. “Ertainek Bizkaiko dantzari dantza, umeek ohiko korro dantzak eta nagusiek Bizkaiko jota zaharren koreografia bat estreinatuko dute aurten”.
Oletako jai batzordeko kideak. Argazkia: Oletako jai batzordea
Astelehen [ekainak 10] gauean Luhartz talde bizkaitarraren erromeria hasiko da. Eta, goizaldean, erromerian dantzan eta lagunarteko giro ederrean kantuan ibili ondoren, asko urte osoa itxaroten egongo diren unea ailegatuko da: jaietako klasikoa bihurtu den umorez betetako gizon eta emakumeen striptease-a. Ohiturari eutsiz, plazan batutakoek barre algara artean jaiak agurtzeko modua edukiko dute aurten ere.
Autobus zerbitzu berezia. Amorotarrentzat ezeze, Lea-Artibai eskualdeko eta inguruko herritarrentzat ere hitzodu berezia izaten dira Oleta auzoko Pazko jaiak. Eta aurten ere, nahi duenak autorik hartu barik bertara joateko aukera edukiko du, Gababusari zein Oletako Jai Batzordeak Lekeitiotik zuzenean jartzen duen autobus zerbitzuari esker.
Zapatu gauean, jai batzordeak antolatuta, autobus zerbitzua etengabea egongo da Lekeitioko Eskolapetik Oletara. 22:00etatik 06:00etara egongo da zerbitzua abantean. Zapatuan, gainera, eskualdeko gainontzeko herri guztietatik Gababus zerbitzua ere egongo da. Jaien azkenengo gauaz gozatu nahi dutenek ere doako autobus zerbitzua edukiko dute. 22:30ean hasi eta 00:00etara Lekeitiotik Oletara bertatzerako aukera egongo da. Bueltarako, berriz, 02:30etik 04:00etara egongo da martxan zerbitzua.
EGITARAUA
- Ekainak 8, zapatua
- 20:00. Tortilla txapelketa.
- 23:00. Kontzertuak: Nabil, Modus Operandi eta Oxabi.
- Ekainak 9, domeka
- 12:30. Meza, Oletako zelaian.
- Ondoren. Amorotoko Arta Nagusi dantza taldearen saioa.
- 18:30. Giza proba desafio ikusgarria; Amoroto vs Mendaro.
- Jarraian. Pisu ezezaguneko berunaren erronka.
- Ostean. Jaietako zozketa berezia.
- Egun osoan. Naiara eta Izarra trikitilariak.
- Ekainak 10, astelehena
- 17:30. Haur eta gazteentzako jolasak Bat, Bi, Hiru Festa! taldeak girotuta, ohe elastikoak etapuzgarri erraldoiak.
- 23:00. Erromeria Luhartz taldeagaz.
- 00:45. Gizon eta emakume striptease-a.
