Amaia Galdos eta Nerea Badiola: "Kontxako Bandera eskuetan eduki arte ez genuen asimilatu"
Amaia Galdos Garcia eta Nerea Badiola Agirre ondarrutarrek arraun egiten duten Orioko ‘Txiki’ traineruak sekulakoa egin du aurten. Liga irabazteaz gain, XII. Kontxako Bandera ere irabazi du.
Amaia Galdoz, ezkerrean, eta Nerea Badiola, eskuman, Kontxako Banderaren erreplikagaz. Aurtengoa urte borobila izan da zuentzat.
Amaia Galdos: Sekulako denboraldia izan da. Ezin da hitzez azaldu.
Nerea Badiola: Helburuak estropadaz estropada ezartzen joan gara, eta liga amaitu arte ez gara ohartu lortu dugunagaz. Liga irabazi osteko ospakizunetan konturatu ginen zer irabazi genuen. Kontxan ere berdin gertatu zaigu. Egia esan, Kontxara begira ez nuen buruan bandera irabazi ahalko nuenik ere. Kontxako Bandera eskuetan hartu arte ez genuen asmilatu.
Ligan 12 banderatik 11 irabazi dituzue.
A.G.: Denboraldi oso oparoa izan da. Denboraldi-aurreko estropada guztiak irabazi ditugu, eta ligan, Lekeitioko estropada izan ezik, guztiak irabazi ditugu.
N.B.: Ligako errekorra ezarri dugu. Jokoan egon diren 56 puntutik 55 lortu ditugu.
Zein izan da aurten Orioren sekretua?
N.B.: Iazko blokea fisikoki beste urrats bat emanda egon da. Neguan sekulako lan gogorra egin dugu, eta horren eragina probetan islatu da. Egin dituzten fitxaketak ere oso onak izan dira, eta denboraldi-aurretik hasita, beste koxka bat igo dugu.
A.G.: Iaz banderak irabazteko borrokan bigarren sailkatzen ginen, eta banderaren bat irabazteko anbizioa geneukan. Eta aurten, iazko gogoari eutsita, motibazio handiagaz arraun egin dugu.
Kontxa irabazteko faboritoak zineten. Presio hori sentitu duzue?
A.G.: Jendeak bandera irabaziko genuela ziurtzat ematen zuen, eta presio hori igarri dugu.
N.B.: Kanpoko presioa baino, taldeko presioa gehiago igarri dugu. Denboraldi-aurreko estropada guztiak eta ligako estropadetatik bat izan ezik guztiak irabazi ditugu. Eta, berez, gauzak ondo eginda, irabazteko aukerak genituela ikusten genuen, baina dena ondo egin behar genuenaren presioa sentitzen genuen.
Kontxako Banderak xarma berezia dauka. Zergatik?
A.G.: Lehiatzen duzun ligako aurkariez gain, beste ligetako traineruak ere bertan daude. Sailkapen fasean ere sekulako jendetza batzen da arlanpan, eta bertan sortzen den giroa berezia da, bakarra.
N.B.: Historia handia duen estropadarik garrantzitsuena da.
Kontxako hiru hitzorduak zelan bizi izan dituzue?
N.B.: Lehen jardunaldian ez genuen guk nahi modura arraunean egin. Ez genuen gure betiko arraunkera hartu, presioak gehiago eginda. Hurrengo sailkatuei sei segundoko tartea atera genien, baina ez genuen sentsazio onenekin amaitu. Ez ginen gure mailan ibili. Bigarren jardunaldian, hasieratik hartu genuen gure arraunkera, eta estropada horregaz oso gustura geratu ginen.
Bigarren jardunaldia nagusitasun osoz irabaziko zenutela ikusita, zelakoak izan ziren helmugaratu aurreko azken metroak?
N.B.: Irteera indartsua egin, eta arraunkera finkatu genuenean irabazi egingo genuela ziur ikusi nuen. Arraunean oso ondo ari ginen, eta, egia esan, lehen minututik azken segundora asko gozatu nuen. Azken metroetan konturatu nintzen besteekiko zer abantaila genuen. Banekien lehen postuan gindoazela, baina nire bandatik ez zen ikusten besteekiko zelako tartea zegoen.
Hiru estropadetan arraun egiteko aukera eduki duzue?
A.G.: Sailkapen estropadan eta lehen jardunaldian barruan joan nintzen, baina bigarrenean ez.
N.B.: Nik neuk hiru jardunaldietan egin dut arraun, baina entrenatzaileak aldaketa asko egiten ditu, eta jende askok jokatu dugu Kontxa. Bandera denona moduan sentitzeko aukera izan dugu modu horretara, eta hori niretzat oso garrantzitsua da.
Amaia, bigarren jardunaldia zelan bizi izan zenuen kanpotik?
A.G.: Txarto. Kanpoko ziabogan entrenatzaileak eta arraunlariak txalupan egon ginen estropada ikusten. Irten eta hirugarren minutuan aurretik zoazela ikusita, negarrez hasi nintzen, erabat hunkituta.
Bandera astindu osteko uneak zelan gogoratzen dituzue?
N.B.: Bizitzako une onenetakoa izan zen. Sinestezina izan zen.
A.G.: Egun osoan eskuak dardaraka izan nituen, urduritasunagaz. Oso hunkigarria izan zen.
Zelan sentitu duzue arraunzaleen babesa?
N.B.: Orioko zaleak primerakoak dira. Gu sartzen ari ginen bitartean, mutilak estropada jokatzen ari ziren, eta arlanpa guztia Orioko zaleez bete zen guri ongietorria emateko. Orioko zaleez gain, ondarrutar asko etorri ziren gu zoriontzera. Egia esan, ondarrutarren aldetik ere oso babestuta sentitu gara.
A.G.: Estropada guztietan zaleen babesa sentitu dugu. Zaleak denera etorri dira.
Kontxa irabazi eta gero, zelako harrera egin zizueten Orion?
A.G.: Beti ezustekoren bat edo beste ematen digute. Bazkaltzen amaitu orduko, ibilgailu aldaketa berezi bat genuela esan ziguten. Eta halako batean, kamioi bat ikusi genuen. Plazaraino kamioi gainean joan ginen. Sekulakoa izan zen.
N.B.: Udaletxeko balkoira igo ginenean plaza guztia zalez beteta zegoen. Gizonezkoen bi taldeak ere guri harrera egitera etorri ziren; oso polita izan zen. Egun borobila.
Aurten, estreinako, Ondarroak emakumeen trainerua uretaratu du. Zelan ikusi duzue?
A.G.: Ondo ibili dira, baina Kontxako sailkapen estropadan, ahizpak bertan egiten du arraun, oso pozik amaitu zuten. Esan didatenez, egin duten estropadarik onena izan zen Donostiakoa, denboraldia borobilduz. Talde berria da, eta esperientzia behar dute ondo ibiltzeko. Denboraldiak aurrera egin ahala hobeto ibili dira.
N.B.: Liga guztia atzetik aurrera egin dutela uste dut. Potentzial handiko taldea da, baina oraindik oso gaztea. Traineruak uretan jarraitzen badu, argi dago gorako joera izango duela. Sekulako nesken taldea sortu dute azken urteotan. Oinarriak finkatuta daude, eta hori da garrantzitsuena aurrera begira. Herrian, gainera, sekulako ilusioa ikusten dugu emakumeen taldea dagoelako.
Emakumeen arraunaren egoera zelan dago?
N.B.: Gutxika-gutxika, aurrera egiten goaz, baina gizonezkoen mailara iristeko tarte handia geratzen da. Ligako estropadetan, esaterako, ez dugu berdin kobratzen. Zarauzko eta Kontxako estropaden sariak daude bakarrik parekatuta. Kasu batzuetan, errekonozimendua maila ere ez da bera izaten. Baina horrez gain, parekidetasunera heltzeko badago zer hobetu ere.
Zer, esate baterako?
N.B.: Gizonezkoen kasuan hamabi talde daude gorengoko mailan, baina emakumezkoen liga lau besterik ez daude. ETE ligan ere aurten hasi dira sariak banatzen, eta gizonezkoei beragoko mailetan sekulako sariak ematen izan dizkiete askoz aurretik.
