Zabalik dago Mutrikuko pala txapelketan izena emateko epea
Txapelketa ahalik eta orekatuena egite aldera, aurten hirugarren maila bat sortu dute. Izen ematea urriaren 2a arte zabalik dago.
Danok Bat Pelotazale Elkarteak antolatuta eta Mutrikuko Udalak lagunduta aurten ere pala txapelketa jokatuko da. Antolatzaileek aditzera eman dutenez, txapelketaren lehen jardunaldia urriaren 12an jokatuko dute. Izena emateko interesa dutenek urriaren 2a aurretik eman beharko dute izena. Parte hartzeko interesa dutenek Miruaitz frontoian bertan eman ahalko dute izena edota ondorengo telefono zenbakietara deituta: 617 72 34 56, 943- 60 41 91 edo 634 42 65 88.
Txapelketa, ohi modura, binaka jokatuko dute. 16 urtetik gorakoentzat dago zabalik, eta izena ematerako orduan 45 euro ordaindu beharko dira bikoteko. Danok Bat elkarteko kideek aurreratu dutenez, dagoeneko hamabost bat bikotek eman dute izena txapelketa. Txapelketak urte asko daramatza martxan, eta ondo errotua dago. Herritarrez gain, beste hainbat tokitako parte hartzaileek ere parte hartzen dute. Antolatzaileek aurten ere gonbidapen zabala egin diete herriko, eskualdeko eta inguruetako palistei eta zaleei.
Berritasun modura, eta parte hartzaileen maila orekatze alde, txapelketa bi mailatan ordez hiru mailatan banatuta jokatuko dute. “Txapelketa denok jokatzeko modukoa izatea nahi dugu. Bigarren mailan bikote batzutatik bestera alde handia dago, eta hirugarren maila bat sortzea erabaki dugu”. Nabarmendu dutenez, bikoteen mailaren arabera antolakuntzak aldaketa egin ditzake maila bakoitzeko berdintasuna bermatzeko.
Ohi modura, ligaxka bat jokatuko dute lehendabizi, eta ondoren azken fasea jokatutako dute sailkapen taulako aurrenekoek. Sariei dagokienez, txapelak, oroigarriak eta materiala egongo dira jokoan, besteak beste.
