Otsailaren 21ean amaituko dituzte Mutriku eta Deba batzen dituen GI-638 errepideko lanak
Alkoleako tunel berria zirkulaziora zabalik geratu da gaur goizean, eta horri esker, errepide berriaren behin-betiko trazatua izango dena zeharkatu dute erabiltzaileek. Tamaina txikiagoko obrak amaitzea falta dela azaldu dute aldundiko ordezkariek.
Garoa Arizmendi Mutrikuko alkateordea, Markel Olano diputatu nagusia, Ruben Andonegi Mutrikuko gobernazio zinegotzia eta Aintzane Oiarbide Bide azpiegituretako diputatua,gaur goizean, Alkolea tunela ireki bertatik igarotzen Gaur [urtarrilak 22] goizean Alkoleako tunel berria estreinatu dute Mutriku eta Deba artean ibili diren lehen ibilgailuek. Alkoleako bihurgunea itxi, eta 09:40ean hasi dira lehen ibilgailuak tuneletik igarotzen. Tunela irekitzearekin batera, errepide berria zirkulazioara erabat zabalduta geratu da; errepidearen trazatu berria oso-osorik egin ahal izan dute errepidearen erabiltzaileek.
Markel Olano Gipuzkoako diputatu nagusia, Aintzane Oiarbide Bide Azpiegituretako diputatua eta Mutrikuko hainbat udal ordezkari Mutriku eta Deba arteko GI-638 errepideko lanak bisitatzen egon dira, Alkoleako tunel berria zirkulazioari zabaldu aurretik, eta diputatu nagusiak bertan azpimarratu duenez, otsailaren 21erako lan guztiak amaituta edukitzea aurreikusten dute. “Oraindik ere tamaina txikiagoko obrak amaitzea falta da. Aurreikusten dugunez, otsailaren 21erako behin betiko amaiera izango dute obra hauek. Hala ere, bien bitartean eragozpenen bat edo beste egongo da”.
Aintzane Oiarbide Bide Azpiegituretako diputuak azaldu duenez, oraindik ere garbigune aurrean dagoen plataformaren sostengatzea, euste eta argiztapen sistema, seinaleztapenaren erremateak, espaloiaren zolaketa eta Ondarbeltzeko hondartzaren hormaren estaldura egitea falta dira. “Lan horiek guztiak egiteko egiteko errei bat erabili beharko da”.
Lanak 2019 urtarrilaren amaieran hasi ziren 10 milioi euroko aurrekontuarekin, eta nabarmendu dutenez, obra aurreikusitako egutegia betetzen ari da.
Olanok gaurko agerraldian jakitera eman duenez, 106 metro luzera duen Alkoleako eraikuntza obrako gune kritikoenetako bat izan da, baina horri esker, mutrikuarrek lurraldearekin “lotura modernoagoa, seguruagoa eta lehiakorragoa” izango dute. “Errepide berriko puntu garrantzitsuenetakoa da hau. Tunel honekin puntu honetako trazadura nabarmen hobetuko da, eta Alkoleako muturreko bihurgunea itxia alde batera utziko dute gidariek, arrisku guneak nabarmen leunduz”.
Eta errepidean egin diren hobekuntzek gidarien segurtasuna handitzeaz gain, herritarren bizi kalitateari egiten dioten onura ere nabarmendu nahi izan du foru arduradunak. “Oinezko pasealekuarekin eta bide gorriarekin, herri hauetako biztanleak gure itsasertzeko paisaiaz gozatu ahal izango dute ibilaldi osasungarriak eginez”.
Alkoleako tunelarekin batera, bestalde, 40 metroko altuera duen Ipitxarriko lur-erauzketa izan dira obraren gune korapilotsuenak. “Dagoeneko biak daude amaituta. Errepide berria zabalduta, zirkulazio guztia behin betiko bidetik joango da, eta, modu horretan, oinezkoen bidea amaitu ahalko da orain”. Ipitxarri eta Alkolean libre gelditu diren errepide zatietan guneak antolatu, eta oinezkoekin eta bizikletekin bateragarriak diren ibilgailunetzako aparkalekuak egokitzeko asmoa agertu dute.
