Bizipozaren dokumentala eta dokuweba aurkeztuko dituzte Ondarroan
Aurkezpena domekan egingo dute Ondarroako Beikozini aretoan, 18:30ean hasita. Bizipozaren proiektua bultzatzeko herriko eta eskualdeko kirolari eta artista ezagunak gonbidatu dituzte taulagainera
Noemi Uribe eta Aitzol Etxaniz, Arnasa elkarteko kideak Bizipoza egitasmoa osatzen duten 35 elkarteak ezagutzera eman eta gizarterako asmoz, Gure bizipoza, guztiona dokumentalaren eta dokuwebaren aurkezpen ekitaldia egingo dute domekan [urtarrilak 26], 18:30ean, Ondarroako Beikozini aretoan.
Antolatzaileek agertu dutenez, Bizipoza irabazi asmorik gabeko gizartegintza egitasmoa zer den azaltzen duen emanaldia izango da. Ekitaldian, besteak beste, herritarrei elkartea, eta bere helburuak eta egitekoak emango zaizkie ezagutzera. Arnasa elkarteko kide ondarrutarrak ibili dira aurkezpena antolatzen, eta euren dokuwebagaz batera Naizen eta Gehitu elkarteen ikus-entzunezkoak ere proiektatuko dituztela iragarri dute.
Hiru elkarteetako dokuweb motzez gain, dokumental luzeago bat ere proiektatuko dute. “35 elkarteon dokuweb bakoitza egiteko erabilitako irudiak batu, eta 18 minutu inguruko making of antzerako dokumental luzeagoa egin dute”.
Aurkezpenak hiriburuetan egin zituzten lehendabizi, eta orain eskualdez eskualde ari dira dokuweben eta dokumentalaren proiekzioak egiten. “Hiriburuetako aurkezpenak amaitu dira, eta orain eskualde mailakoak egiten ari gara”.
Aurkezpena era oso berezian egiteko asmoa dutela iragarri dute. Eta Bizipozaren proiektua bultzatzeko herriko zein eskualdeko kirolari eta artista ezagunak gonbidatu dituzte: Artaka akrobazioa aeroa, Nerea Ibarzabal eta Xabat Galletebeitia bertsolariak, Ondarroako arraunlariak, Herri eta Bixi, Inhar Urruzuno harrijasotzailea eta Keu Agirretxea musikaria. “Hiriburuetan egin den antzeko formatua jarraituko dugu”.
Asisko Urmeneta ilustratzaileak ere parte hartuko du ekitaldian. Beikozini aretoaren txoko batean ekimenari buruzko hormairudia marrazten egongo da, unean bertan. “Amaieran zer egin duen aurkeztuko digu”.
Oro har, Bizipoza egitasmoa herritarrei zer den azaltzea izango da Ugaitz Alegriak eta Anabel Arraizak aurkeztuko duten ekitaldiaren beste helburuetako bat. Domekako ekitaldia, gainera, Bizipozako boluntario berriak erakartzeko baliatuko dutela azpimarratu dute. Eta hori guztiori aurrera eramateko boluntario sare bat martxan jartzea beharrezkoa dela jakitera eman dute. “Beharra dugunenerako boluntario sare bat sortzea da gure asmoa”.
Jendearen sostengua, hauspoa eta babesa jasotzeak berebiziko garrantzia duela gaineratu dute; hori dela eta, Ondarroa eta inguruko herritarrak ekitaldira gonbidatu dituzte. “Domeka arratsalderako plan polit-polita da”.
