Grebara deituz, agerraldia egin dute Ondarroan
Euskal Herriko Eskubide Sozialen Kartako hainbat eragilek grebaren lanketan parte hartzera gonbidatu dituzte herritarrak.
Ondarroako hainbat eragile, greba orokorrerako deia egiten Herrietako greba batzordeak antolatzen jarraitzen dute. Ondarroan, hainbat eragile batu dira greba batzordean Euskal Herriko Eskubide Sozialen Kartakoekin batera, eta esan dutenez, grebaren lanketa aurrera doa. Gaur [urtarrilak 23], esaterako, argazkia atera dute Zubi Zaharrean, greban parte hartzera dei egiteko.
Greba egiteko hainbat arrazoi daudela azpimarratu dute. “Beste eredu bat nahi eta behar dugu: diru publikoagaz bizitzak erdigunean jarriko dituena”. Agerraldian azaldu dutenez, pentsiodunak antolatzen hasi zirenetik bi urte igaro dira. Baina argi utzi nahi izan dutenez, pentsiodunak ez dira ari soilik euren eskubideen defentsan. “Gu denon defentsan aritu dira. Etorkizuneko pentsioen defentsan. Gure bizitza eta etorkizuna da jokoan dagoena”.
Gaurko ekintzagaz, beste alde batetik, grebaren lanketan parte hartzera gonbidatu dituzte herritarrak: “Oraindik lan asko geratzen da egiteko, eta eskertuko genuke ondarrutar gehiagoren laguntza. Ondarrutar guztiei adi egoteko eskatu nahi diegu, eta grebaren lanketan parte hartzera gonbidatu, greba denona eta denon aldekoa delako. Horregatik, urtarrilaren 30ean denok kalera, denok grebara”.
Gaiagaz lotuta, gainera, astelehenerako [urtarrilak 27] manifestazioa deitu dute herriko pentsiodunek. 12:00etan Alamedan batu eta Alde Zaharreraino joango dira.
