Mutrikun agertu den izurdea gaixorik dagoela uste dute adituek
Ambar elkartekoen iritziz, izurde marradun bat portuko uretan ikustea ez da seinale ona izaten. Ustez, hiltzera etorri da sakonera gutxiko uretara.
Izurde marraduna Mutrikun Egunotan izurdeak agertu dira Mutrikuko portuko uretan. Zehatz esanda, eguen [urtarrilak 30] gauean hiru izurde marradun (Stenella coeruleoalba) ikuskatu zituzten, baina bi itsaso zabalera atera ostean, bakarrak jarraitzen du Arkugain elkartearen parean igerian. Portu barruan, azaleko uretan, hainbeste egun jarraitzeko arrazoi bakarra gaixorik egotea dela uste dute Ambar Itsas Faunaren Ikerketa eta Babesaren Elkarteko adituek. “Izurde marradun bat portuko uretan ikustea ez da seinale ona. Ozeano zabalean ibiltzeko ohitura dute”.
Hain zuzen ere, izurde marraduna ur ozeanikoetan ibiltzen den ugaztuna da, eta kostaldera oso gutxitan hurbiltzen da. Euskal Herriko kostaldean, izurde marraduna ia urte osoan ikustea ohikoa da; oro har, kostaldetik 10-15 milietara ikusten dira. Leire Ruiz Sancho Ambar elkarteko biologoaren iritziz, hiltzera etorri da portura. “Lasai dago eta inork ez dio enbarazurik egiten, baina bere itxura eta igeri egiteko era animalia gaixo batena da. Espezie hau, batzuetan, nahiko azaleko uretan agertzen da hiltzera. Ez dakigu zer gertatuko den, eta zain gaude”.
Ruiz Sanchok gaineratu duenez, izurdearen igeri egiteko era oso kezkagarria da. “Uretatik airea arnasteko irtetzen den tartea ohikoa baino luzeagoa da, eta zertxobait alboratuta dabilela ikus daiteke. Denbora tarte batean begira baldin bazaude, agerikoa da ez daukala izurde marradun baten ohiko portaera; egunak daramatza zentzu berean bueltaka, eta bistakoa da ez dagoela ondo“.
Izurdeak sekulako ikusmina eragin du herrian. Egunotan jende joan-etorri handia ibili da Mutrikuko moilan, izurdearen igeriketa ikusteko. Bien bitartean, Ambar elkartekoak jarraipena egiten ari dira animaliari, batez ere, animalia lasai egon dadin. Ohartarazi dutenez, oso garrantzitsua da animalia lasai uztea. “Gizakiaren hurbiltasunak oso modu negatiboan eragiten die, eta bere egoera okertu baino ez dute egingo. Animalia ez molestatzea ere gomendatzen dugu; ahalik eta lasaien egotea komeni da. Aldi berean, eta, batez ere, segurtasunagatik, inor bere inguruan ez bainatzea gomendatzen dugu, eta ontziak edo itsas motorrak ez hurreratzea. Animalia basatiak dira, eta bertara igerira sartuz gero kolperen bat edo horzkada bat ere jaso daiteke eta”.
Lehorreratutako izurde batekin aurketuz gero, berehala 112ra deitzea gomendatzen dute. “Larrialdi zerbitzuko arduradunek protokoloa abian jarriko dute, eta gurekin jarriko dira harremanetan”.
