Giro ona nagusitu da 30. Ondarru Igeri Sarian
Ondarru Igeri Taldeko entrenatzaileak jakitera eman duenez, igerilariek nahikoa emaitza onak lortu dituzte. Ia kategoria denetan Ondarru Igeri Taldekoren batek irabazi edo podiuma egin zuen.
30. Ondarru Igeri Saria. Argazkia: Ondarroako Kirolaren Leihoa Ondarru Igeri Taldeak antolatuta, igeriketako 30. Ondarru Saria lehiatu zuten zapatuan [otsailak 8] Zaldupe udal kiroldegiko igerilekuan. Iragarri modura, Ondarroa, Markina-Xemein, Lekeitio, Zalla eta Igorreko eskolar mailako eta federatutako 100 igerilari inguru batu ziren. Antolatzaileek nabarmendu dutenez, giro ona nagusi izan zen uretan zein kanpoan.
10:00ak bueltan ekin zioten txapelketari. 50 metro eta 100 metroko lasterketak tximeleta, bizkar, bular eta crawl estiloetan egin zituzten igeri parte hartzaileek. Horrez gain, taldekako errelebo lasterketak ere egin zituzten estiloetan zein crawl erara. 12:00ak aldera amaitu zen lehia. “Txapelketa ohikoa baino azkarrago amaitu zen”.
Ondarru Igeri Taldeko entrenatzaileak jakitera eman duenez, igerilariek nahikoa emaitza onak lortu zituzten. “Ia kategoria denetan Ondarru Igeri Taldekoren batek irabazi edo podiuma egin zuen. Alde horretatik oso pozik gaude. Denak ere emaitzak hobetzen ari dira gutxinaka. Gazteenak txapelketatik txapelketara nahikoa hobetzen ari dira. Federatuak ere ehunenekoen gorabeheran hobetzen ari dira”.
Txapelketa amaitu, sailkapenak batu eta parte hartzaileak dutxatzen eta prestatzen ari ziren bitartean Ondarroako igeri eskolakoek erakustaldia egin zuten. Haur bakoitzak luze bat egin zuen crawl estiloan eta beste bat bizkar estiloan. Azkenik, sari banaketa egin zuten Zaldupeko kantxan, harmailetan gurasoak eta gainontzeko parte hartzaileak animatzen ari ziren bitartean. Gaineratu dutenez, gazteenen erakustaldia goizera pasatzea positiboa izan da. “Nagusiekin batera banatu genizkien sariak, eta modu horretara, txapelketaren parte modura sentitu ziren”.
