Nahia Quincoces gustura bueltatu da Munduko Koparen hirugarren probatik
Posturik onena banakako lasterketan eskuratu du eskiatzaile mendexarrak. Hamar onenen artean amaitu du. Lasterketa bertikalean ere nahikoa emaitza ona lortu du.
Nahia Quincoces Alemaniako Munduko Kopan. Argazkia: Maurizio Torri. Asteburuan Munduko Koparen hirugarren jardunaldia jokatu dute Jennestierren (Alemania). Txinako proba bertan behera geratu ostean, nazioarteko mendi eskiatzaileek kategoria guztietan lehiatu behar izan dute. Barikuan [otsailak 7] lasterketa bertikala egin zuten, zapatuan [otsailak 8] banakakoa eta domekan [otsailak 9] esprint lasterketa. Hiru proba jokatu ostean, oso pozik agertu da Nahia Quincoces eskiatzaile mendexarra. “Sentsazio oso onekin ibili naiz. Aurreko Munduko Kopetan baino sentsazio hobeagoekin ibili naiz fisikoki. Lasterketa bertikalean eta baita banakakoan ere, hasieratik neure erritmoari ekin nion, eta gustura ibili nintzen”.
Lasterketa bertikalari dagokionez, 13. postuan amaitu zuen. 500 metro positibo inguruko desnibela zuen, eta 2,2 kilometroko luzerako ibilbidea egiteko 25 minutu eta 54 segundo behar izan zituen. Eskiatzaile mendexarrak azpimarratu duenez, gauzak ondo egin zituen, eta bere erritmoari eutsi zion. “Ohikoa baino lasterketa laburragoa izan zen; desnibel handikoa. Nahikoa lasterketa gogorra izan zen, eta indartsu joan behar zinen denbora guztian. Hasieran nahikoa indartsu irten nuen, eta erritmo bat ezarri ostean, horri jarraitzen saiatu nintzen. Momenturen baten posturen bat edo beste aurrerago ere ibili nintzen, azken esprintean postu bat galdu nuen, 13. amaituz”.
Banakako lasterketan, berriz, lasterketa ona sinatu zuen, Top 10ean bete-betean sartuz. 1.348 metroko desnibeldun eta 5 kilometroko luzerako ibilbidea osatzeko ordu 1, 21 minutu eta 18 segundo behar izan zituen. Nabarmendu duenez, atzetik aurrera ibili zen. “Oso pozik nago lortutako emaitzagaz”.
Gaineratu duenez, ondo moldatzen da banakako lasterketan. “Banakako lasterketa niri gehien gustatzen eta moldatzen naizen lasterketa mota da. Aldaketa askoko ibilbide teknikoa izan zen, zeta askogaz. Irteera labur bat egin genuen pistatik, eta jarraian basotik jarraitu genuen. Hasieran hainbat eskiatzaile joan ginen multzoan. Oinezko zatiak bi tarte zituen lehenengo eta bigarrengo igoeran. Hor oso ondo sentitu nintzen, eta posturen bat edo beste aurreratzea lortu nuen. Lasterketaren azken txanpan atzetik aurrera joan nintzen, eta 10. postuan amaitu nuen, aurreko biengandik hurre hurre. Ez nuen aurreko biak harrapatzea lortu”.
Domekan, azkenik, esprint lasterketan 22. postua eskuratu zuen. 4 minutu eta 16 segundoko marka eginda, finalerdietako kanporaketan sartzeko aukerarik barik geratu zen. “Ez nintzen amaierako faserako sailkatu. Hamabi eskiatzaile sailkatzen dira finalerdietara, eta ni kanpoan geratu nintzen. Esprintak ez dira nire berezitasuna, eta alde horretatik lasai nago”.
