Plaiko Zubiaren eraberritze lanak uda ostean amaitzea aurreikusten dute
Bizkaiko Foru Aldundiko iturriek zehaztu dutenez, zubiaren "egoera txarra" tarteko, uste baino zailagoa ari da izaten eraberritze prozesua. Arrazoi horregatik atzeratuko da aurretik iragarritako epea.
Plaiko Zubiaren konpontze lanak. Argazkia: Bizkaiko Foru Aldundia Bizkaiko Foru Aldundiko Ekonomi eta Lurralde Garapena Sustatzeko Saileko iturriek jakitera eman dutenez, aurreikusitako epea baino beranduago amaituko dituzte Ondarroako Plaiko Zubia eraberritzeko lanak. Hasiera batean, bederatzi hilabeteko lanen ostean, udan amaitu behar zituzten lanak, baina zubiaren “egoera txarra” tarteko, uste baino zailagoa ari da izaten eraberritze prozesua; uda amaierarako zubia bere lekuan egotea aurreikusten dute.
Data hori bete ahal izateko, baina, prozesu guztia aurreikusi bezala joan beharko dela azpimarratu dute. Izan ere, Bizkaiko Foru Aldundiko iturriek zehaztu dutenez, zubiaren zatiak lantegira heldu zirenean uste baino egoera txarragoan zeuden. Azaldu dutenez, beste atzerapenik egon ezean, zehaztutako epea betetzeko gai izango dira.
Iragarri dutenez, administrazio izapideek normaltasunez jarraituko balute, zimenduak aurreikusi modura igo ahalko balituzkete eta gainerako probak ere positiboak badira, pasabidearen zati batzuk uda aurretik muntatu ahal izango lituzkete.
Gaur egun, ekainaren hasieran zubitik moztutako zatiak mota horretako lanak egiten espezializatuta dagoen Galdakaoko Orion enpresaren lantegian ari dira eraberritzen. Nabarmendu dutenez, ahalik eta pieza original gehien mantenduta eraberrituko dute. Beste pieza batzuk, bestalde, erabat hondatuta zeuden, eta antzeko itxurakoak sortzen ari dira. Mekanismo originalak, esaterako, nahikoa hondatuta zeuden, eta horretarako pieza berriak eraiki behar izan dituzte.
1927an eraikitako zubia Euskal Kultura Ondareko Zerrenda Orokorrean sartuta dago, Monumentuen multzoan. Hori dela eta, kontu handiz egiten ari dira eraberritze lanak; artisau eran ari dira zubia konpontzen, zubia eraikitako garaiaren antzera. Zubiak birgaitze lanei esker, galduta eduki duen biratzeko gaitasuna berreskuratuko du.
