Berdinketa lortu du Aurrerak etxean
Talde bateko zein besteko atezainek protagonismo berezia eduki dute husna amaitu den partiduan. Aurrera gehiago izan da bigarren zatian, baina ezin izan du aurkariaren atea zulatu.
Aurrera eta Getxoren arteko neurketa, Zaldupen Aurrerako gizonezkoen talde nagusiak balio handiko puntua eskuratu zuen zapatuan [otsailak 15] Getxo Lurraldeko Ohorezko mailako 1 multzoko liderraren aurka. Zaldupen lortutako berdinketari esker, galdu gabeko bolada onari jarraipena eman diote Ibon Lopezen mutilek. Atzo husna berdindu ostean, 41 puntugaz sailkapenean lider jarraitzen du Getxok. Bi puntu gutxiagogaz, bigarren postuan tinko mantentzen da talde ondarrutarra.
Aurrerak partidu gogorra aurreikusten zuen Getxoren aurka, eta halakoa izan zen. Getxo oso talde lehiakorra eta sendoa bada ere, ondarrutarrak ez ziren kikildu haien aurrean, eta ondo estutu zituzten zelaigunean. Lehia, oro har, nahikoa irekia eta gorabehera askokoa izan zen; bi taldeek gol aukera asko tartekatu zituzten, baina inor ez zen gai izan aurkariaren atea zulatzeko. Garaipena lortzeko merezimenduak egin zituzten, baina berdinketagaz konformatu behar izan zuten.
Lehenengo zatiaren hasierako tartean, getxoztarrak nagusi izan ziren zelaigunean, baina gero egoera erabat orekatu zen. Bi taldeek markagailuan aurreratzeko hainbat aukera eduki zituzten, baina ez zituzten aprobetxatu. Atsedenaldiaren ostean kementsuago eta joko biziagoagaz zelairatu ziren Lopezen mutilak. Baloiaren jabetza neurri handi batean Aurrerak eduki zuen: jokaldi oso onak egin zituzten, eta joko aldetik gehiago zirela erakutsi zuten. Hegaletik eta aurretik behin eta berriro iristen saiatu ziren, baina baloia gutxigatik kanpora joan edo atezainaren eskuetan amaitzen zuen. Egia esan, bigarren zatian gol aukera gehiago sortu eta aurkarien defentsagaz buruz burukoa handia izan bazen ere, ez zuten markagailuan aldaketarik eragitea lortu.
31. minutuan, gainera, jokaldi bizi eta gogor baten ostean bigarren txartel horia atera zioten Jon Martinez de Lukori, eta Aurrerak bat gutxiagogaz ekin behar izan zion partiduaren azken ordu laurdenari. Txartel gorriak ezustean harrapatu zuen talde ondarrutarra, eta istilu txiki bat ere eragin zuen bi taldeen eta epailearen artean. Bat gutxiagogaz jokatzea kolpe latza izan zen etxekoentzako, baina, hala ere, maila ona erakutsi, eta ez zuten gehiegirik sufritu. 40. minutuan, berriz, Ibon Lopez zuzeneko txartel gorriagaz kaleratu zuten.
Neurketari hutsean eusteko, oro har, atezainek egindako geldiketak erabakigarriak izan ziren. Partidu osoan talde bateko zein besteko atezainek protagonismo handia eduki zuten. Ez zuten hutsik egin, eta sekulako geldiketak egin zituzten Aurrerako Oier San Migelek eta Getxoko Gorka Debak. Hain zuzen ere, aurkarien aukera guztiak ezerezean laga zituzten.
Klubaren asmoetako bat Zaldupe betetzea zen, eta hala izan zen; jende asko egon zen harmailetan eserita, baita zelaian inguratzen duten hesi atzeetan ere. Ezarritako helburua arrakastaz bete zela azpimarratu zuen Eladino Gonzalez Aurrera Kirol Elkartearen presidenteak. “Zaldupe beteta ikusi dugu, eta pozik gaude. Eskertzekoa da jendearen erantzuna. Partidu garrantzitsua eta erakargarria zen, eta ikusmin horrek ere jendea bertara erakarri du. Futbol ederra ikusi dugu zelaigunean, eta partidu polita izan da. Pena da ez irabazi izana. Hala ere, liderraren aurka puntu banaketa ez da txarra. Irabazita abantaila lortuko genuke, baina hurrengo partiduetara begira irabazteko asmo horregaz jarraitu behar dugu”. Datorren astean ere etxean jokatuko dute ondarrutarrek. “Datorren astean irabazten badugu, taularen hasierako postu horietan lekukotzeko aukera handia daukagu”.
