Lea-Artibai eta Mutrikuko bizilagunak kalera atera dira Zaldibarren gertatutakoa argitzeko exijitzeko
Manifestazioa egin dute Markina-Xemeinen, eta elkarretaratzea Mutrikun. Aste bi igaro dira Zaldibarko zabortegian lur jauzia gertatu zenetik, eta oraindik desagertuta jarraitzen duten bi langileak aurkitzea lehentasuna dela azpimarratu dute.
Zaldibarko lur jausia argitzeko eskatuz Markina-Xemeinen egin den eskualdeko manifestazioa. Zaldibar argitu, orain! lelo hartuta, manifestazio jendetsuak zeharkatu ditu gaur [otsailak 20] arratsaldean Markina-Xemeingo kaleak. Joan den asteko astelehenean [otsailak 10] herri mailan egindako protesta Lea-Artibai eskualde osora zabaldu dute oraingoan, eta deialdiak erantzun zabala eduki du.
Goiko Portaletik abiatu da manifestazioa 18:30ean, Alberto Sololuze Markina-Xemeingo bizilagunaren senideak eta eskualdeko eragile ezberdinak pankarta atzean direla, eta horiekin batera, eskualdeko herritar ugari, gertaera argitzeko eskaera ozen eta irmoa eginez. Zaldibar argitu! eta Hau zirkua da! oihukatu dituzte.
Herrian zehar manifestazioa eginda, Goiko Portalean amaitu da protesta, irakurketa bategaz. Aste bi igaro dira Zaldibarko zabortegian lur jauzia gertatu zenetik, eta oraindik desagertuta jarraitzen duten bi langileak aurkitzea lehentasuna dela azpimarratu dute. Horrela, lehen berbak desagertutako langileen senideentzat izan dira. «Gure elkartasun, babes eta maitasun osoa helarazi nahi dizuegu. Zuekin gaude, eta zuekin jarraituko dugu hasi besterik egin ez den borroka honetan. Bihotzez, animo, eta eutsi». Besarkada beroa eskaini diete bai eta «lan baldintza arriskutsu horietan lanean jardun duten lankideei» eta «zabortegi anabasa horretan diharduten langileei» ere.
Zaldibarko ezbeharretik 14 egun igarota langileen berririk ez izatea eta gaiaren inguruan dagoen isiltasuna ulergaitza iruditzen zaiela esan dute
Batzuek alarmistatzat jo dituzten arren, kezkatzeko arrazoiak badaudela esan dute: «Lehenengo, ez omen zegoen kutsagarria zen materialik, gero, amiantoa aurkitu zuten, gero, ez zegoela ura edateko arriskurik, baina Eitzagako auzotarrei ura ez edateko gomendatu zieten. Airearen kalitatea ere ona omen zen, eta azkenean, ohikoa baino 40 aldiz dioxina eta furano gehiago zeudela eta, etxeetako leihoak itxita mantentzea eta kirolik ez egitea gomendatu zuten. Zer izango da hurrengoa? Noiz arte jarraituko dugu horrela?».
Zaldibarko ezbeharretik 14 egun igarota langileen berririk ez izatea eta gaiaren inguruan dagoen isiltasuna ulergaitza iruditzen zaiela esan dute, eta azalpenak ematea eskatu dute. «Ez dago ezer mingarri, injustu eta salatariagorik, hitzak eta erantzunak espero dituzunaren isiltasuna baino. Arduradun politikoei, enpresari, ingurumen sailburuari, lehendakariari, esaten diegu Zaldibarko zabortegiarekin gertatutakoa ez dela bigarren mailako arazo bat. Larritasun handiko arazoa dela eta eman beharreko erantzuna maila berekoa izan behar dela».
Ekitaldiari amaiera bateratua emanez, inguruetako bertsolariek egindako bertsoa kantatu dute Goiko Portalean batutako guztiek.
Markina-Xemeingo mobilizazioagaz gainera, beste herri batzuetan ere egin dituzte protestak eta salaketak. Mutrikun, esate baterako, Goiko plazan elkartu dira herritarrak 10 minutuko elkarretaratze zaratatsua egiteko.
Euskal gehiengo sindikala Gernika-Lumon egin duten elkarretaratzean. Argazkia: LAB
Bestalde, euskal gehiengo sindikala ere kalera irten da. ELA, LAB, ESK, STEILAS, HIRU eta Etxaldek ekimen bateratua egin dute gaur goizean. Bilbo, Donostia, Gasteiz, Iruñea eta eskualde-buruetako egoitzen aurrean elkarretaratzeak egin dituzte. Gertatutakoa argitzeko eskatu dute sindikatuek Zaldibar Argitu. 2 aste desagertuta. 11+2. Prekarietatea hiltzailea lelopean. Sindikatuen ustez, zaborren kudeaketa ekonomizistak eragin du luizia. “Oinarrizko azpiegitura publikoa izan behar lukeen zabortegia diru-irabaziaren logikan kudeatu da eta, horrez gain, administrazio publikoak ez du kontrol publiko eraginkorrik egin».
