Lea-Artibaiko bost bikote, Bizkaiko eskolarteko eskuz binakako txapelketaren finalean
Markina-Xemeingo esku Pilota Taldetik hiru bikote ailegatu dira finalera. Lea Ibarra Motrollo Pilota Elkartetik bik edukiko dute horretarako aukera.
Aurreko astean finalaurrekoetan bikain ibili ostean, Bizkaiko eskolarteko eskuz binakako txapelketaren finala jokatuko dute otsailaren 29an, 15:45ean hasita, Iurretako Olaburu frontoian. Txapelketa benjamin, ume eta gaztetxoak kategorietan jokatu dute, eta bertoko bost bikote ailegatu dira azken fasera.
Markina-Xemeingo esku Pilota Taldetik, esaterako, hiru bikote ailegatu dira finalera, eta Lea Ibarra Motrollo Pilota Elkartetik bik edukiko dute horretarako aukera. Unax Arrizabalaga eta Ibai Arakistain pilotariek osatutako Markina A bikoteak Umeen B Baxuko finala jokatuko du. Erdu A zornotzarrak izango dituzte aurkari. Umeen A mailako finaleko txapela, berriz, eskualdean geratuko da. Markina-Xemeingo Unax Albizuren eta Unax Ibarzabalen aurka neurtu beharko dituzte indarrak Lea Ibarra Motrollo Unax eta Antton Urzelai anaiek. “Albizuk eta Ibarzabalek bikote oso sendoa osatzen dute. Txapelketa irabazteko faborito argiak dira”, azaldu du Unai Arrizabalaga Lea Ibarra Motrolloko ordezkariak
Lea Ibarra Motrolloko Jaime eta Alex Andrinua anai bikiek Gaztetxoen B Baxuko finala jokatuko dute Gallarta N bikotearen aurka. “Gallartakoak txapelketa irabazteko faborito nagusiak dira. Oso bikote indartsua dira, baina ligaxkan ez dute Andrinua anaien aurka jokatu”, gaineratu du Arrizabalagak. Jardunaldiko azken partidua Gaztetxoen A mailakoek jokatuko dute. Lagun Onak taldeko bikotearen aurka ariko dira nor baino nor indartsuago Markina-Xemeingo Mikel Egurrola eta Markel Calvok.
Pello Urionabarrenetxea Markina-Xemeingo Esku Pilota Taldeko entrenatzailea pozik agertu da taldeko hiru bikote finalean egoteaz. Dionez, finalera heldu diren pilotari denek maila handia daukate, eta zaila izango da garaipena eskuratzea. Hala ere, hiru bikote finaletan, eta euretako bi, gainera, maila altueneko finaletan (A maila) egotea seinale ona dela dio. “Gureek zein aurkariek daukate irabazteko aukera, lehia egongo da beraz”.
Markina-Xemeingo taldeko bikoteak finalaurrekoetan ere maila ona erakutsi zutela azaldu du Urionabarrenetxeak, baina finaletako urduritasunak sarritan zeresana izaten duela aipatu du. “Finaletan egonak daude, eta beraz, urduritasuna neurtzen jakingo dutela espero dut”.
Guztira, Markina-Xemeingo Esku Pilota Taldeko hamalau bikotek parte hartu dute Bizkaiko Eskolarteko txapelketan, horietatik hamar, ume eta gaztetxoen kategorietan. Lea Ibarra Motrollotik, bestalde, zazpi bikotek parte hartu dute lehian. “Finalerdietara ailegatu diren bi bikoteek finaletarako txartela eskuratu dute”.
