Ondarroako Txomin Agirre 28ko eraikina aurten eraitsiko dute
Datozen asteetan udalak lehiaketara aterako ditu eraisketa lanak egiteko baldintzak. Udalak 300.000 euro inguru aurreratu ditu lanak egiteko.
Ondarroako udal ordezkariek jakitera eman duenez, Txomin Agirre 28 zenbakian legez kanpo egin zen eraikina aurten eraitsi beharko dute. “Hasita dago eraisketa lanak hasi aurretik martxan jarri behar izaten den prozesua”. Datozen asteetan udalak lehiaketara aterako ditu eraisketa lanak egiteko baldintzak; lehiaketa irabazten duen enpresak edukiko du eraisketa lanak egiteko ardura.
Gaineratu dutenez, udalak enpresa bat kontratatu zuen eraisketa lanak zelan egin behar diren zehazteko. Hain zuzen ere, proiektu hori urtarrilaren 21ean erregistratu zuten. Proiektu horretan, besteak beste, eraisketa egiteko era eta jarraituko beharreko urratsak zehaztzen dira. Era berean, alboetako etxeek kalteren bat jasanez gero lanak gelditzea, arrakalen aurkalo protokoloa eta lekukoak ipintzea ere jasotzen ditu.
Eraikinaren jabetza, berez, LKS-Laboral Kutxarena da, baina eraikina ez eraistea erabaki zuen. “Bere interesak direla -eta ezetz esan dionez, udalak hartu behar izan du subsidiarioki ardura hori”. Zunbeltz Bedialauneta Ibaibarriaga alkateak azaldu duenez, udalak 300.000 inguru aurreratu beharko ditu eraisketa lanak egiteko. “Diru hori gero enpresari erreklamatuko diogu, baina bitartean dirua udalak aurreratu behar izatea gainkarga handia dakar guretzat”. Eraikinari dagokionez, eraikina egiteko lanak 2007an baimendu zituzten orduan udal gobernuan zeuden agintariek; baina gerora eraikina legez kanpokoa zela esan zuen epaile batek.
