URAren oniritzi faltan, epe motzean hasi nahi dute Ondarroako Errenteriako zubia konpontzen
Aurreproiektua Dimark enpresak egin du, eta 63.473,41 euroko aurrekontua dute lanek. Udalak aurten egin nahi ditu lanak
Kalte nabarmenak ditu Errenteriako zubia Ondarroako udal iturriek jakitera eman dutenez, Errenteria auzoko zubia konpontzeko aurreproiektua eginda dago. Aurreproiektua Dimark enpresak egin du, eta aurkeztutako aurrekontua 63.473,41 eurokoa da. Zubiaren konpetentzia Eusko Jaurlaritzaren URA agentziarena da berez; hori dela eta, erakunde horren oniritzia behar dute aurreproiektua onartu, lanak lizitazioara ateratzeko eta lanei lehenbailehen ekin ahal izateko. URAk udalak aurkeztutako proposamena onartzen ez badu, zer aldatu proposatu beharko du. “Udalak lanak 2020an hasi nahi ditu, beti ere URA agentziaren oniritzia lortu eta gero”.
2018ko abenduan azpiegitura ixtea erabaki zuen udalak ibilgailuentzat, halabeharrez, erabiltzaileentzat arriskutsua izan zitekeelakoan. Izan ere, egituraren egonkortasuna ez zen segurua. Zubiak auzokoen egunerokotasuna daukan garrantzia ikusirik, konponbidea bilatzeari ekin zion udalak. Egoera zaila zela ikusita, Zunbeltz Bedialauneta Ibaibarriaga alkateak administrazioaren konpromisoa erakutsi zuen 2019ko otsailean, azpiegituraren egoera zein zen sakonki aztertzeko eta irtenbide posible bat bilatzeko.
Orain, kudeaketa horiek guztiak eginda, Dimark enpresak aurkeztu ditu beharrezko txosten tekniko guztiak, baita arazoari zelako irtenbidea eman behar zaion azaltzen duen txostena ere. “Udalak Errenteria auzokoei azaldu dizkie txosten horien nondik norakoak”. Txosten horien arabera, Errenteriako auzoko alderantz dauden zubiaren lehen eta bigarren zatiaren egiturazko elementuen narriadura handia da. “Dimark enpresak udalari aurkeztu dion txostenaren arabera, lehen bi zati hauen konponketa osoa egin behar da. Hirugarren eta laugarren zatietan eta oinarrietan aurkitu diren gabeziak konpondu beharko dira”.
