Inauteri giroa izan da nagusi Lekeition
Aterrunea aprobetxatu eta kalera irten dira Lekeitioko Eskolako eta Azkue Ikastolako neska-mutikoak, Lekitto musika bandak eta Musikaia banda txikik lagunduta, inauteri jaiari hasiera emateko.
Mozorrotuak Lekeitioko portuan zehar kalejiran. Zirimiri apur bat egin badu ere, inauteri martitzeneko kalejira egitea erabaki dute gaur [otsailak 25] Lekeition. Aterrunea aprobetxatu eta kalera irten dira Lekeitioko Eskolako eta Azkue Ikastolako neska-mutikoak, Lekitto musika bandak eta Musikaia banda txikik lagunduta. Urtero modura, Inauterietako jaiari hasiera emanez, Ateatik plazarainoko ibilbidea egin dute kalejira alaian, guraso, irakasle eta senideekin batera.
Kalejira jendetsua osatu dute mozorrotuek. Besteak beste, 101 Dalmata, Ozeko aztia, Rock Eskola, Adams Familia eta Errege Lehoia filmeko pertsonaiek, naturako izaki eta landare eta itsas zein lehorreko animaliek – erle, zuhaitz, olagarro, tximeleta, arrain…– zeharkatu dute aurtengoan Lekeitio. Ibilbidea baina, laburragoa izan da, Tala ingurutik pasatu beharrean, San Pedropetik egin dute buelta plazaraino. Hantxe egin dute dantza, gero, guztiek batera, Antero bezalako abesti ezagunak kantatuz. Independentzia plaza jendez gainezka egon da, ikastetxeetako ikas komunitateaz gainera herritar asko hurreratu dira eta festa ikusi edo bertan parte hartzera.
Plazan jai giroan ibili ondoren, ikastetxera itzuli dira Lekeitioko Eskolakoak jaiagaz jarraitzeko, eta frontoirako bidea hartu dute Azkue Ikastolakoek antzerki emanaldia eskaintzeko. Aurtengo gaia Munduari erasoa izan dute ikastolakoek, Eskolakoek, berriz, film musikalekin lotutako ikuskizuna egin dute.
