Kulturaniztasunaren inauteriak, Ispasterren
Ispasterko Eskolako ikasleek eta irakasleek Brazilgo, Zelanda Berriko, Indiako eta Afrikako jantzi eta doinuak eroan dituzte herriko frontoira.
Brazilgo, Zeelanda Berriko, Indiako eta Afrikako herritarrek bisitatu dute gaur [otsailak 25], Ispaster. Frontoia ikuskizun erraldoiaren topagune izan dute, beste urte batez.
Eskolako umeek euren dantzarako eta sormenerako grina agerian utzi dute oraingo honetan ere. Gerria, hankak, eskuak zein buruak astindu dituzte. Inauteri martitzena oso berezia da ispastertarrentzat eta dena ondo ateratzeko prestaketa lanak mimo handiz egin dituztela igarri da. Herrialde bakoitzaren jantzi eta dantzez gain, aipatu hiru lekuetako informazioa ere bilatu dute gaurko, eta frontoiko horma-irudietan erakutsi dituzte.
Ohi legez, txikienetik nagusienera, mailaka atera dira euren koreografiak eskaintzera. Kolorez, umorez eta ilusioz bete dute herriko frontoia, eta iaz moduan aurten ere, guraso talde bat ere animatu da pare bat dantza egitera.
Ikuskizunaren ostean, ondo merezitako hamaiketako ederrean batu dira, eta festak frontoian jarraitu du bazkalordura arte. Aurten, gainera, euriaren eraginez kalejira ere bertan egin dute.
