Lekeitioko Larrotegi futbol zelaia handituko du udalak
Araudiak exijitzen duen gutxieneko neurrira zabalduko dute. Musika Eskolaren lanak egiteko lizitazioa zabalik dago.
Lekeitioko Larrotegi futbol zelaia. Argazkia: Lekeitioko Udala Larrotegi futbol zelaia handitzeko proiektua esku artean dauka Lekeitioko Udalak. Berdegunea handitzea dute helburu, eta araudiak exijitzen duen gutxieneko neurrira zabalduko dute.
Udalak jakitera eman duenez, bi metro gehiago luzatuko dute berdegunea. “Azterketak egin ditugu eta gehiago ezin da handitu, errekatxo bat dago eta URA agentziak neurri batzuk betetea eskatzen du”, azaldu du Koldo Goitia Lekeitioko alkateak.
Berdegunea handitzegaz gainera, ureztapena ere berritu nahi dute eta argi berriak ipini. “Zelai guztia argiztatzeko dorretxoak egokituko ditugu”.
Larrotegi berritzeko lanak, dena dela, bi zatitan egitea aurreikusi dute. Hala, zabaltze lanak aurten egingo dira, eta datorren urtean, berriz, zelaia altzatu eta belar artifizial berria ipiniko dute.
Larrotegi futbol zelaiak 25 urte beteko ditu aurten, hondarrezkoa izan zen bost bat urtez, eta belar artifiziala jarri zioten ondoren. Aurreratu dutenez, maiatzean 25. urteurrena ospatu nahi dute, eta ospakizunen ondoren hasiko dituzte obrak.
Musika Eskola. Musika Eskolako pleguak ere prest ditu udalak. Jakitera eman dutenez, Eliz Atea kalean kokatzen den musika eskolaren zerbitzua hobetzeko asmoz, eraikina egokitzeko azken obrak egingo dira ekainaren 22tik aurrera.
Eraikinaren beheko solairuan zuzendaritza eta irakasle gela bat eta entsegu gela handi bat egingo dituzte, eta gainera, eraikina hustea errazteko segurtasun eskailera bat jarriko dute eraikinaren kanpoaldean.
Musika eskolen beharrak arautzen dituen Eusko Jaurlaritzaren dekretua kontuan izanda, hainbat obra egin dituzte aurreko urteetan ere eraikinean. Aurtengo ikasturtean, esate baterako, gela berriak estreinatu dituzte. Erdiko solairua geletan banatu eta sei gela berri atera zituzten: 20m2-ko bi gela eta beste hiru 15m2-koak, horietaz gain irakasleen gela bat ere egin da 20m2-koa. Era berean, solairu honetan sortu diren gela guztiak isolamendu akustikoa dute. Horretaz gain, komun egokituak ere jarri zituzten. Lan horiek, aurtengoak bezala, oporraldian eraman zituzten aurrera.
Aurreko urtean, aldiz, solairu horretan zegoen patioa estali eta ikasgela bihurtu zuten. Goiko solairua momentuz, dagoen bezala utzi dute, eraikinean dauden bi zerbitzuentzako, Gaztegune zein Musikaia Musika Eskola, erabilgarria den gune zabal bat eskaintzeko.
Azken faserako obretarako proposamenak aurkezteko lizitazioa otsailaren 26ra arte egongo da irekita. Lanak hamar asteko iraupena izango dute gehienez, eta, guztira, 155.000 mila euroko inbertsioa egingo da bertan.
